जिन्स पाइन्ट लगाएको विरोधमा बालिकाको हत्या !

दिल्ली । पछिल्लो समय महिला र युवती आफ्नै परिवारद्वारा मारिएको खबर भारतीय मिडियाको हेडलाइन बनेको छ । यो घटनाले भारतीय समाजमा महिला र युवती आफ्नै परिवारबाट कति सुरक्षित छन् भन्ने बहस पनि सुरु भएको छ ।

गतसाता उत्तर प्रदेशमा एकजना १७ वर्षिया बालिकाको हत्यो परिवारबाटै भयो । आरोप थियो – जिन्स पाइन्ट लगाउनु ।

उत्तर प्रदेशको डियोरिया जिल्लास्थित साभ्रेजी खर्ग गाउँमा आफ्नै आफन्तको कुटाइबाट ती बालिकाको मृत्यु भयो । बालिकाकी आमा शकुन्तला देवीका अनुसार काका र हजुरबाले निर्घात कुटपिट गरेपछि बालिका मारिएकी थिइन् ।

लुगाको विषयमा परिवारका सदस्यबीच झगडा भएको बीबीसी हिन्दीले जनाएको छ । शकुन्तलाका अनुसार सानो झगडाले हिंसाको रुप लिएको थियो ।

‘उनी एकदिनको लागि उपवास बसेकी थिइन् । त्यसदिनको बेलुका उनी जिन्स लगाएरै पूजापाठमा बसिन् । त्यतिबेला उनका हजुरबाले जिन्सको लुगा लगाएको भन्दै विरोध गरे । अनि उसले आफूले जिन्सको लुगा लगाउन पाउनुुपर्ने भन्दै बताइन्’ शकुन्तला देवीले भनिन् ।

कुटपिटबाट बेहोस् भएकी बालिकालाई रिक्सा बोलाएर अस्पताल लगिएको थियो । अर्को बिहान स्थानीय गण्डकी नदीको पुलमा बालिकाको शव भेटियो । प्रहरीले हत्यामा संलग्न भएको भन्दै १० जनाविरुद्ध मुद्दा दायर गरेको छ ।