भण्डारणको समस्या भएपछि चिनियाँ खोपलाई सीधै प्रदेशमा पठाउँदै सरकार

काठमाडौं । सरकारले चीनबाट ल्याइएको भेरोसेल खोपलाई सीधै प्रदेशको चिस्यान केन्द्रमा पठाउन सुरु गरेको छ । भण्डारणमा समस्या हुने भएपछि सरकारले खोपलाई प्रदेशमा पठाउन लागेको हो ।

अमेरिकाले १५ लाख डोज जोन्सन एन्ड जोन्सन खोप दिने भएपछि सरकारलाई भण्डारको समस्या भएको हो । अहिले टेकु अस्पतालको चिस्यान केन्द्रमा ६ लाख मात्रै डोज अटाउँछ ।

अमेरिकाबाट आउने १५ लाख डोज खोपलाई पनि सुरक्षित भण्डारण गर्नुपर्ने बाध्यता सरकारलाई छ । चीनबाट यसैसाता ल्याइएको ८ लाख डोज खोपलाई प्रदेशका चिस्यान केन्द्रमा पठाउन लागिएको हो ।

जसमध्ये २ लाख मात्रा हेटौंडा र पोखरामा पठाइएको स्वास्थ्य सेवा विभागले जनाएको छ । लुम्बिनीको बुटवलमा पनि भण्डारणको लागि खोप पठाउने तयारीमा विभाग छ ।

सरकारले चीनबाट ल्याएको ८ लाख डोजलाई ५५ वर्षभन्दा माथिल्लो उमेरका नागरिकलाई लगाउने तयारी गरेको छ तर, यसबारे निर्णय भैसकेको छैन । साथै, वैदेशिक रोजगारीमा जाने मानिसलाई समेत गन्तव्य मुलुकले खोप अनिवार्य गरेपछि उक्त समूहलाई पनि लगाउने तयारीमा सरकार छ ।