विपी प्रतिष्ठान बचाउन माग गर्दै प्रदर्शन (तस्बिरहरू)

काठमाडौं । राजनीतिक दबाबले विपी कोइराला प्रतिष्ठानमा बेथिति बढेको भन्दै नागरिक अगुवासहितका युवाले विरोध प्रदर्शन गरेका छन् । अभियन्ता नारायण वाग्लेसहितका व्यक्तिले काठमाडौंको माइतीघरमा सांकेतिक रूपमा भकुण्डो प्रदर्शनसमेत गरे ।

प्रतिष्ठान तथा विश्वविद्यालयमा पदाधिकारी नियुक्तिमा नातावाद, कृपावाद हावी भएको भन्दै प्रदर्शनकारीले दबाबमूलक नारा लेखिएका ब्यानर र प्लेकार्ड बोकेका थिए ।

उनीहरूले फुटबलमा ‘झेली गरे रेड कार्ड, राजनीतिमा झेली गरे नियुक्ति’ भन्दै सरकारमाथि व्यंग्य गरेका छन् ।

धरान विपी कोइराला स्वास्थ्य विज्ञान प्रतिष्ठान चिकित्सक, विद्यार्थी एवं कर्मचारीहरूले केही सातादेखि चरणबद्ध आन्दोलन गरिरहेका छन् । प्रतिष्ठान सुधारको माग गर्दै उनीहरूले उपकुलपतिसहितका पदाधिकारीको राजीनामा माग गरिरहेका छन् ।