अन्तरीक्षमा फिल्म सुटिङको होड : टम क्रुजपछि रुसी अभिनेत्रीले गरिन् छायांकन घोषणा

मस्को । यस्तो लाग्छ राजनीतिसँगै अन्तरीक्ष क्षेत्रमा पनि अमेरिका र रुसबीच प्रतिस्पर्धा चलिरहेको छ । मिसन इम्पोसिबल स्टार हलिउड अभिनेता टम क्रुजले गतवर्ष आफ्नो आगामी फिल्म अन्तरीक्षमा गर्ने घोषणा गरेका थिए ।

यस्तोमा रुसी अभिनेत्री युरिया पेरेसिल्ड पनि आफूले अन्तरीक्षमा फिल्म छायांकन गर्ने बताएकी छिन् । उनले आफू प्रतिस्पर्धामा पहिलोभन्दा पनि उत्कृष्ट बन्न चाहेको बताएकी छिन् ।

३६ वर्षे अभिनेत्री युलिया निर्देशक क्लिम सिपेँसँग रुसी रकेटमार्फत अन्तरीक्ष प्रस्थान गर्नेछिन् । उक्त रकेटले ५ अक्टोबरमा कजाकिस्तानको बाइकोनुर कस्मोड्रोमबाट प्रक्षेपण गर्नेछ ।

फिल्मको शीर्षक तय नभएपनि यो फिल्म एक चिकित्सकको कथामा आधारित हुनेछ जो एक अन्तरीक्ष यात्रीको जीवन बचाउन स्पेसमा जान्छ । बजेट नखुलाइएपनि स्पेसमा सुटिङ हुने भएपछि महंगो नै हुने ठानिएको छ ।

रकेटमा जानुपूर्व अहिले अभिनेत्री युलिया र निर्देशक क्लिमको मेडिकल, स्पेस फ्लाइट सेसन र क्रिएटिभ सेलेक्सन प्रोसेसको सुरुआत भएको छ । अर्कोतर्फ, आगामी फिल्मका लागि टम क्रुजले हलिउड कम्पनी युनिभर्सल पिक्चर्ससँग सहकार्य गर्ने भएका छन् । यसको बजेट १५०० करोड भारु हुने जनाइएको छ ।