महन्थजीलाई स्वागत गर्न पाउँदा विजयी महसुस गरेको छु : हृदयेश

रुपन्देही । स्वास्थ्य तथा जनसंख्यामन्त्री हृदयेश त्रिपाठीले आफ्नो लाइनले राजनीतिक नेतृत्वको दुरदर्शीतालाई पुष्टि गरिसकेकाले अब छिट्टै नयाँ दल दर्ता गर्ने बताएका छन् ।

शुक्रबार गृहजिल्ला पश्चिमनवलपरासी आएका त्रिपाठीले नयाँ दल दर्ताबारे कसैसँग पनि छलफल भने नभएको बताए । जनता सामाजवादी पार्टीका नेता महन्थ ठाकुर समूहसँग मिलेर नयाँ पार्टी दर्ता गर्न लागेको भन्नेबारेको चर्चा निराधार हल्ला मात्र भएको मन्त्री त्रिपाठीको भनाइ छ ।

‘महन्थजीसँग भेटघाट भइरहेपनि दल दर्ताबारे कुनै छलफल भएको छैन’, उनको भनाइ छ । आफूले तत्कालीन एमालेसँग गठबन्धन गर्दा आरोप लगाउने महन्थ ठाकुर र उपेन्द्र यादवहरू क्रमशः आफूले अंगिकार गरेको राजनीतिक लाइनमा आएको दावी गरे ।

जसपाका महन्थ ठाकुर पक्ष सरकारमा सामेल हुने तयारीका सन्दर्भमा त्रिपाठीले भने, ‘१९ महिना सरकारमा बसेर जानुभएका उपेन्द्रजीलाई बिदाई गरेपछि अहिले महन्थजीलाई स्वागत गर्न पाउँदा नैतिक र राजनीतिरूपमा विजयी महसुस गरेको छु ।’