ओलीको आरोप : माधव नेपाल बिकेर पतित भए, देउवाले भाषिक शिष्टता बिर्सिए (भिडियो) – Nepal Press

ओलीको आरोप : माधव नेपाल बिकेर पतित भए, देउवाले भाषिक शिष्टता बिर्सिए (भिडियो)

काठमाडौं । प्रधानमन्त्री केपी शर्मा ओलीले नेकपा एमालेका नेता माधवकुमार नेपाल बिकेपछि आफ्नै पार्टीको सरकार ढाल्न विपक्षीसँग गठबन्धन गरेको आरोप लगाएका छन् ।

काठमाडौंमा शनिवार आयोजित कार्यक्रमलाई सम्बोधन गर्दै प्रधानमन्त्री ओलीले कम्युनिष्ट आन्दोलन सिध्याउन केही नेता बिकाउ र पतित भएको आरोप लगाए ।

ओलीले भने- हिजैमात्र देखियो जसको विरुद्ध चुनाव लडेर आइयो र भोलि पनि प्रतिस्पर्धा गर्नु छ, विपक्षी नेतालाई प्रधानमन्त्री बनाउन लागेको देखियो । अनुशासन तोडेर, पार्टी निर्णय निर्णय गरिरहनु पर्दैन त्यस्ता कुरामा । तर जब नेता बिक्छन्, जब नेता पतित हुन्छन् आन्दोलनलाई सिध्याउन उद्यत हुन्छन् ।

ओलीले अदालतले फैसला गर्नुअघि नै प्रचण्ड माधवले पार्टी फुटाइसकेको बताए । अर्को प्रसंगमा प्रधानमन्त्री ओली कांग्रेस सभापति शेरवहादुर देउवाप्रति पनि रुष्ट देखिए ।

देउवाले शनिबार राष्ट्रपति विद्यादेवी भण्डारीले आफूले १४९ जनाको हस्ताक्षरसहित दाबी गरे पनि प्रधानमन्त्री नियुक्त नगरेको तर प्रतिनिधि सभा विघटन गरिदिएको भन्दै विज्ञप्ति निकालेका थिए ।

उनको विज्ञप्तिको भाषामा राष्ट्रपतिलाई आदरार्थी शब्द प्रयोग नभएको भन्दै प्रधानमन्त्री ओलीले आपत्ती जनाएका हुन्।

सम्मानित पदमा पुगेको जनताका छोराछोरीलाई सम्मान गर्नुहुन्न भन्ने हामीलाई परेको छ। अरूको त के कुरा नेपाली कांग्रेसका सभापतिले पनि त्यो गरिमा राख्न चाहनुभएन। राष्ट्रपतिलाई यसो गरिन् भनेर लेखिएको छ, ओलीले भने, ‘यसबाट थाहा हुन्छ गणतन्त्रलाई खुइल्याउने षडयन्त्र कहाँसम्म पुगेको रहेछ।’

 

प्रतिक्रिया

Leave a Reply

Your email address will not be published. Required fields are marked *