बिरामी खोज्दै जनप्रतिनिधि र स्वास्थ्यकर्मी गाउँगाउँमा – Nepal Press

बिरामी खोज्दै जनप्रतिनिधि र स्वास्थ्यकर्मी गाउँगाउँमा

वालिङ । यहाँका जनप्रतिनिधि र स्वास्थ्यकर्मी कोरोना संक्रमित बिरामी खोज्दै दैनिक गाउँगाउँमा जाने गरेका छन् ।

विश्वव्यापी महामारीका रूपमा तीव्रगतिमा फैलिरहेको नयाँ भेरियन्टसहित कोभिड-१९ को संक्रमण उच्च भएका बेला वालिङका जनप्रतिनिधि स्वास्थ्यकर्मीसहित गाउँगाउँमा पुगेर उपचार गरिरहेका छन् ।

वालिङमा कोरोनाको संक्रमण दर उच्च रहेको र गाउँगाउँका नागरिकमा अझ बढी समस्या देखिएको नगरप्रमुख दिलीपप्रताप खाँणले बताए ।

‘गाउँगाउँमा संक्रमण दर झनै उच्च छ, कोरोनाका लक्षणसँग मिल्ने बिरामी धेरै हुनुहुन्छ,’ उनले भने, ‘गाउँगाउँबाट लौ यस्तो समस्या देखियो, बिरामी धेरै हुनुहुन्छ भनेर फोन आउँछ अनि जनप्रतिनिधिसहितको स्वास्थ्यकर्मीको टोली गाउँगाउँमा पुग्छौँ,’ गाउँमा पुगेर आवश्यकता हेरी एन्टिजेन परीक्षण गर्ने, ज्वरो नाप्ने, अक्सिजनको मात्रा नाप्ने, आवश्यक पर्ने औषधि दिनुका साथै उहाँहरुलाई परामर्श दिने गरिएको उनले बताए ।

नगरपालिकाले नगरका १४ वटै वडामा रहेका आफ्ना नागरिकलाई स्वास्थ्यसम्बन्धी समस्या हुँदा जुनसुकै बेला अस्पतालसम्म ल्याउनका लागि ‘हाइअलर्ट’मा एम्बुलेन्स र अन्य जीप तयारी अवस्थामा राखेको उनले बताए । ‘गाउँगाउँमा रहेका नागरिकलाई स्वास्थ्यसम्बन्धी समस्या देखिनासाथै जतिबेला पनि फोन गर्नुहोला भनेर अत्यावश्यक नम्बर दिएर छाडेका छौं,’ उनले भने, ‘राति १/२ बजे पनि फोन आउँछ, लौ यो ठाउँमा फलानालाई श्वासप्रश्वासमा समस्या देखियो गाडी एम्बुलेन्स पठाइदिनुपर्‍यो ।’

समस्या भएका बिरामीलाई रातदिन नभनी वालिङस्थित  प्राथमिक अस्पतालमा ल्याएर उपचार गर्ने गरिएको छ । नगरपालिकाले गाउँमा स्वास्थ्य परीक्षण तथा औषधि वितरणका लागि दुईवटा टोली गठन गरेर सेवा दिइरहेको स्वास्थ्य शाखा प्रमुख एवं जनस्वास्थ्य निरीक्षक कमलप्रसाद पाण्डेले बताए ।

नगरप्रमुख, उपप्रमुख, प्रमुख प्रशासकीय अधिकृत, वडाका अध्यक्ष तथा सदस्य जनप्रतिनिधि गाउँगाउँमै सँगै जाँदा स्वास्थ्यकर्मी तथा बिरामीको हौसला बढ्ने गरेको प्रमुख पाण्डेले अनुभव सुनाए ।

‘गाउँगाउँमा बिरामी हुनुहुन्छ कतिपयले डर, त्रासका कारण आफूमा भएको समस्या लुकाएर राख्ने गर्नाले अर्को समस्या थपिएको छ,’ पाण्डेले भने, ‘रोग नलुकाई समयमै सम्पर्क गर्ने, औषधि खाने हो भने बिरामीको ज्यान बचाउन पनि सकिने र अरुलाई सर्ने क्रम पनि घट्ने थियो ।’

स्याङ्जा जिल्लाका एघार पालिकामध्ये हालसम्म वालिङमा सबैभन्दा धेरै संक्रमित छन् ।

रासस

प्रतिक्रिया

Leave a Reply

Your email address will not be published. Required fields are marked *