चीनले सगरमाथा चुचुरोमा ‘सीमा विभाजनको रेखा’ कोर्ने

काठमाडौं । चीनले कोरोनाभाइरस संक्रमणमा रोक लगाउन सगरमाथाको चुचुरोमा नेपाल र तिब्बतबीच सीमा विभाजनको रेखा कोर्ने भएको छ ।

राज्य नियन्त्रित चिनियाँ संचारमाध्यमका अनुसार नेपालको मोहडा हुँदै सगरमाथा आरोहण गर्ने आरोहीमार्फत हुनसक्ने संक्रमणलाई रोक्न सरकारले उक्त निर्णय गरेको हो ।

गत अप्रिलदेखि नै नेपालको सगरमाथा आधार शिविरमा कोरोनाभाइरस संक्रमण व्यापक फैलिएपछि चीन सतर्क भएको हो ।

पर्यटन शुल्क उठाउन नेपालले सगरमाथा आरोहण अभियान स्थगित नगरेको भन्दै व्यापक आलोचना भैरहेको बेला चीनले त्यस्तो निर्णय गरेको रोयटर्सले जनाएको छ ।

डाइनिङ टेबुल जत्रो आकारको सगरमाथा चुचुरोमा कसरी रेखा कोर्ने भन्ने बारेमा चीनले स्पष्ट खुलाएको छैन । तिब्बती आरोहीहरुको एउटा समूहले चुचुरोमा पुगेर रेखा कोर्ने निर्णय गरेको जनाइएको छ ।

सिन्ह्वा न्यूज एजेन्सीले दुबै मोहडाबाट चढ्ने आरोहीलाई संक्रमणबाट जोगाउन चीनले उक्त योजना बनाएको हो । अहिले २१ जना चिनियाँ नागरिकहरु सगरमाथा आरोहणका लागि बाटोमा छन् ।

भाइरस महामारी सुरु भएपछि गतवर्षदेखि चीनले आफ्नो भूभाग हुँदै सगरमाथा चढ्न विदेशीलाई खुला गरेको छैन ।