वर्षको अन्त्यसम्म पनि कार्यान्वयन नहुने आयोजनालाई बजेटमा प्राथमिकता दिनौं : अर्थमन्त्री

काठमाडौं । प्रतिनिधि सभा अन्तर्गतको अर्थ समितिमा उपस्थित भई अर्थमन्त्री विष्णुप्रसाद पौडेलले आर्थिक बर्ष २०७८ र ८९ को बजेट कार्यान्वयन हुने खालको संयमित र अनुशासित बजेट ल्याउने प्रतिवद्धता व्यक्त गरेका छन् ।

आगामी आर्थिक बर्षको बजेटको तयारीबारेको छलफलमा उपस्थित भएका अर्थ मन्त्री पौडेलले बजेट निर्माणको आधारभुत सिद्धान्तहरुलाई आत्मसाथ गर्दै बजेट कार्यान्वयनको सुनिश्चितता गरी अनुशासित बजेट निर्माण गरिने बताए हुन ।

यस्तै उनले आगामी बजेटको मुख्य प्राथमिकता कोभिड–१९ ले अर्थतन्त्रमा सिर्जना गरेको चुनौति र त्यसको सामना गर्ने तर्फ नै हुने बताएका छन ।

कोभिड संक्रमण नियन्त्रण, उपचार र खोपको प्रबन्ध गर्ने, कोभिडबाट प्रभावित आर्थिक, सामाजिक जीवनलाई पुनरउत्थान गर्ने कुरामा चालु आर्थिक वर्षको बजेटले सम्बोधन गरेको र आगामी बजेटबाट पनि सम्बोधन गर्ने उनको भनाई थियो ।

अर्थमन्त्री पौडेलले बजेटलाई प्रभावकारी बनाउन बिषयगत मन्त्रालयहरुसँग पनि समन्वयमा अर्थमन्त्रालयले जोड दिएको समेत बताएका थिए । बजेट निर्माणमा सम्बन्धित मन्त्रालयहरु नै सम्पूर्ण रुपमा जवाफदेही भएर काम गर्ने विश्वास भएकाले अर्थमन्त्रालयले हस्तक्षेप नगर्ने समेत उद्धघोष गरे।

आर्थिक वर्षको अन्त्य सम्म पनि आयोजना कार्यान्वयन नहुने अवस्थाका आयोजनाका लागि बजेट विनियोजन गर्ने भन्दा पनि कार्यान्वयनमा गइसकेका र कार्यान्वयनमा जाने चरणमा रहेका आयोजनालाई बजेटको प्राथमिकतामा राखिने पौडेलको दाबी छ । आयोजना कार्यान्वयनको सन्दर्भमा विगतका समस्याहरुको पुनरावृत्ति नहोस भन्ने सन्दर्भमा मन्त्रालय सजग रहेको पनि स्पष्ट पारे ।