दक्षिण कोरियाद्वारा नेपालको लागि ५ हजार कामदार कोटा निर्धारण

सोल । दक्षिण कोरियाले यसवर्ष नेपालको लागि पाँच हजार ४०० जना कामदारको कोटा निर्धारण गरेको छ । त्यहाँको वैदेशिक रोजगार विभाग (एचआरडी)ले उक्त कोटा निर्धारण गरेको हो ।

सन् २०२१ मा विश्वका विभिन्न देशको लागी ५२ हजार श्रमिक लैजाने कोटा निर्धारण गरेकोमा नेपालले उक्त संख्यामा कोटा प्राप्त गरेको हो । कोरियाले १६ वटा देशको लागी कोटा छुट्याएको छ ।

यस वर्ष परिक्षा उतिर्ण गर्नुपर्ने कति जान पाउँछन् भन्ने स्पष्ट नभएको ईपीएस शाखाका निर्देशक इन्द्र गौतमले जानकारी दिए । उनले भने, ‘अघिल्लो वर्षमा यति कोटा भनेर निर्धारण गरिएको हुन्थ्यो, यो पटक परीक्षा उतीर्ण गर्ने भनिएकाले हामी दुबिधामा छौं ।’

एचआरडीले पहिलो आधा वर्षमा उत्पादनतर्फ एक हजार नेपाली श्रमिक लैजाने भनेको भए पनि चार महिना सकिन लाग्दासमेत कुनै प्रक्रिया अगाडि बढ्न सकेको छैन ।

कोरियाले नेपालबाट सन् २००८ देखि परिक्षा उतीर्ण गरेकोलाई ईपीएसमार्फत कोरिया लग्दै आएको छ । कोरोनाभाइरसको महामारीका कारण कोरिया सरकारले सन् २०२० का परिक्षा सञ्चालन गरेन ।

नेपालमा कोरियाली सरकारले कार्तिकमा परीक्षा फर्म खुलाएर चैतमा परीक्षा लिँदै आएको थियो । यो वर्ष पनि कोरियाली भाषा परीक्षाका विषय अहिलेसम्म टुङ्गो नलागेको ईपीएस शाखाका निर्देशक गौतमले जानकारी दिए ।

शाखाका अनुसार ईपीएसमार्फत रोजगारीका लागि गएका ४५ हजारभन्दा बढी नेपाली युुवा दक्षिण कोरियाको रोजगारीमा गएका थिए त्यसमध्ये हालसम्म ४० हजार युवा त्यहाँ कार्यरत रहेको ईपीएस शाखाले जनाएको छ ।