नेपाल र नामिबियाबीच मेमा क्रिकेट सिरिज गर्ने क्यानको निर्णय

काठमाडौं । नेपाल र नामिबियाबीच आउँदो मे महिनाको तेस्रो सातामा एक दिवसीय क्रिकेट श्रृंखला आयोजना हुने भएको छ । नेपाल क्रिकेट संघको आज मुलपानीमा बसेको बैठकले सो निर्णय लिएको हो ।

सचिव अशोकनाथ प्याकुरेलद्वारा जारी विज्ञप्तिका अनुसार २०२१ को अप्रिल तेस्रो हप्तादेखि नेपाली महिला राष्ट्रिय क्रिकेट टिम र भारतको उत्तराखण्ड महिला क्रिकेट टिमबीच टी–२० र एक दिवसीय मैत्रिपूर्ण खेल सञ्चालनको तयारी क्यानले गर्ने भएको छ । महिला टिमको मुख्य प्रशिक्षकको जिम्मेवारी जगत टमटाले पाएका छन् ।

यसैगरि १८–१८ जना पुरुष तथा महिला क्रिकेट खेलाडीहरुको २०२१ को सेन्ट्रल कन्ट्राक्ट गर्नका लागि आगामी मे १७ सम्ममा बोर्डलाई खेलाडीहरु छनोट गर्दै प्रतिवेदन पेश गर्न ३ सदस्यीय समिति गठन गर्ने निर्णय गरिएको छ ।