प्रधानमन्त्रीको आग्रह : छिमेकी मुलुकमा कोरोना बढ्यो, सतर्क होऔं

काठमाडौं । प्रधानमन्त्री केपी शर्मा ओलीले छिमेकी मुलुक भारतमा कोरोना संक्रमणमा वृद्धि भएको बताउँदै सतर्क रहन आग्रह गरेका छन् ।

चेम्बर अफ कमर्सको ७० औं वार्षिक साधारण सभालाई विहिबार राजधानीमा सम्बोधन गर्दै प्रधानमन्त्रीले खुला सीमाका कारण कोभिड जोखिम बढेको भन्दै सतर्क रहन भनेका हुन् ।

अहिले नै सतर्कता नअपनाए जनजीवन ठप्प पार्नुपर्ने स्थिती आउन सक्ने चेतावनी दिँदै प्रधानमन्त्रीले सावधानीका उपाय अपनाउन आग्रह गरे । उनले भने, ‘यदि हामी सावधान भएनौं भने, हाम्रो जनजीवनलाई पनि ठप्प नगरौं तर, बाध्य भएरै ठप्प पार्ने स्थिती आउन सक्छ ।’

कोभिड–१९ विरुद्धको खोपले शतप्रतिशत काम नगर्ने भएकाले सावधानी अपनाउनु नै सुरक्षित विधि रहेको उनले बताए । ओलीले तातो पानीको बाफ लिने, नुनपानीले कुल्ला गर्ने बानी बसाल्दा कोभिड संक्रमणबाट जोगिन सकिने उनको भनाई छ ।