तमु गुरुङहरूका दुई संगठनबीच २९ वर्षपछि एकीकरण

पोखरा । देशभरका तमु गुरुङहरूको अब एउटै संस्था हुने भएको छ । २०४९ सालदेखि फुटेका तमु ह्युल छोँज धीँ र तमु धीँ नेपालबीच बिहीबार भएको पहिलो वार्तामै एकीकरण गर्ने सहमति भएको छ ।

वार्ताका लागि तमु ह्युलले मनोज गुरुङको संयोजकत्वमा ७ सदस्यीय वार्ता टोली बनाएको थियो भने तमु धीले अध्यक्ष होमवहादुर गुरुङको संयोजकत्वमा ९ सदस्यीय वार्ता टोली बनाएको थियो ।

पोखरामा भएको वार्ता सफल भएसँगै करिब ३० वर्षपछि तमुहरुका दुई संगठन एकीकरण हुने भएका हुन् । देशभर करिब साढे ५ लाख तमु गुरुङहरूको बसोबास छ ।

एकीकरणको सहमति भए पनि संगठनको नाम र झण्डाको बारेमा अर्को वार्तामा टुंगो लाग्ने वार्ता टोली संयोजक मनोज गुरुङले नेपाल प्रेसलाई जानकारी दिए । त्यस्तै आगामी दुई कार्यकालसम्म नेतृत्व आलोपालो हुने सहमति भएको छ ।

हाल तमु ह्युलको अध्यक्ष रेशम गुरुङ छन् भने तमु धी को अध्यक्ष होमवहादुर गुरुङ छन् छन् ।

यसैबीच तमु ह्युल छोँज धीँ राष्ट्रिय परिषदको चैत २७ र २८ मा चितवनमा हुने भनिएको महाधिवेशन स्थगित गर्न पनि वार्ता टोलीले आग्रह गरेको छ ।