प्रधानमन्त्री पदकै लागि हतार गर्दैनौं : प्रवक्ता शर्मा (भिडियो)

काठमाडौं । नेपाली कांग्रेसका प्रवक्ता विश्वप्रकाश शर्माले नयाँ सरकार गठनका लागि राजनीतिक परिस्थिति निर्माण भइनसकेको बताएका छन् ।

कांग्रेसको नेतृत्वमा नयाँ सरकार गठनको चर्चा भइरहेका बेला प्रवक्ता शर्माले सरकारको नेतृत्व लिनकै लागि कांग्रेसले हतार नगर्ने बताएका हुन् ।

‘प्रधानमन्त्री पद लिनकै लागि कांग्रेसले अति अग्रसरता देखाएको छैन । राजनीतिक रुपमा त्यो वातावरण बनिसकेको पनि छैन । त्यस्तो परिस्थिति बनेछ भने कांग्रेसले विचार गर्छ’, शर्माले भने ।

उनले सभापति शेरबहादुर देउवामा जसरी पनि प्रधानमन्त्री बन्नुपर्छ भन्ने भावना नरहेको बताए । कांग्रेस एक्लैले सरकार ढाल्ने वा बनाउने क्षमता नराख्ने र अन्य दलसँग कुरा मिलिनसकेकोले राजनीतिक निकासका लागि अझै समय लाग्ने शर्माको भनाइ छ ।