झापा आन्दोलनको नेतृत्व गर्दा होस् वा प्रधानमन्त्री हुँदा मेरो निष्ठा फेरिएको छैन- ओली – Nepal Press

झापा आन्दोलनको नेतृत्व गर्दा होस् वा प्रधानमन्त्री हुँदा मेरो निष्ठा फेरिएको छैन- ओली

काठमाडौं । प्रधानमन्त्री केपी शर्मा ओलीले झापा आन्दोलनको नेतृत्व गर्दा होस् वा अहिले राज्यको नेतृत्व गर्दा आफू निष्ठाका साथ उद्देश्यमा सक्रिय रहेको बताएका छन् ।

४८ औं सुखानी स्मृति दिवसका अवसरमा प्रधानमन्त्रीले शहीदहरुप्रति श्रद्धान्जली अर्पण गर्दै झापा क्रान्तिको स्मरण गरेका हुन् । २०२७ सालमा केपी ओली, सीपी मैनाली लगायतको नेतृत्वमा झापा क्रान्ति शुरु भएको थियो ।

सोही क्रान्तिमा सहभागी कम्युनिस्ट योद्धाहरु रामनाथ दाहाल, नेत्र घिमिरे, वीरेन राजवंशी, कृष्ण कुइँकेल र नारायण श्रेष्ठलाई तत्कालीन सत्ताले जेल सार्ने बहानामा इलाम र झापाको सिमानामा पर्ने सुखानीको जंगलमा लगेर हत्या गरेको थियो ।

प्रधानमन्त्रीले आफ्ना सहयोद्धाहरुको स्मरण गर्दै कम्युनिस्ट पार्टीले स्थापनाकालमा सैद्धान्तिक रुपमा राखेको गणतन्त्रको मागलाई जनस्तरमा विस्तार गर्दै विभाजित कम्युनिस्ट आन्दोलनलाई सबल बनाउन झापा आन्दोलन एउटा गौरवपूर्ण प्रस्थानबिन्दू थियो भनेका छन् ।

प्रधानमन्त्रीको सन्देशमा भनिएको छ, ‘झापा आन्दोलनको नेतृत्व गर्दा होस् वा प्रधानमन्त्रीको रुपमा राज्य सञ्चानलन गर्दा,जनताको समृद्धि,समाना,सामाजिक न्याय र सुख तथा राष्ट्रको जीवनमा स्वाधीनता,अखण्डता र स्वाभिमान हासिल गर्ने उद्देश्यमा म निष्ठाका साथ सक्रिय छु ।’

प्रतिक्रिया

Leave a Reply

Your email address will not be published. Required fields are marked *