देउवालाई महेश आचार्यको पत्र : कांग्रेसको दृष्टिकोण के हो ?

काठमाडौं । नेपाली कांग्रेसका केन्द्रीय सदस्य एवं पूर्वमन्त्री महेश आचार्यले संसदमा पार्टीले निर्वाह गर्नुपर्ने भूमिकाबारे छलफल गर्न तत्काल केन्द्रीय समितिको बैठक बोलाउन सभापति शेरबहादुर देउवासँग आग्रह गरेका छन् ।

नेता आचार्यले सामाजिक सञ्जालमार्फत सभापति देउवालाई पत्र लेख्दै राष्ट्र, संविधान र संसदीय प्रणालीसँग सम्बन्धित घटनामा कांग्रेस प्रतिक्रिया र योजनाविहीन देखिनु दुर्भाग्यपूर्ण हुनेतर्फ सचेत गराएका हुन् ।

‘अहिलेको संवैधानिक र संसदीय जटिलतालाई समाधान गर्ने अग्रसरता लिन नसक्नु दुर्भाग्यपूर्ण हुनेछ’, आचार्यले लेखेका छन् ।

सर्वोच्च अदालतले प्रतिनिधि सभा पुनःस्थापना गर्नु दूरगामी प्रभाव पार्ने संवैधानिक राजनीतिक घटना रहेको भन्दै आचार्यले त्यसबारे समीक्षा गरी वर्तमान राजनीतिबारे पार्टीको दृष्टिकोण सार्वजनिक गर्न जरुरी रहेको बताएका छन् ।

‘नेपाली कांग्रेसको आह्वानमा सडकमा आएर विरोधसभा र प्रदर्शन गर्ने लाखौं जनता र आफ्नै पार्टीका साथीप्रति धन्यवाद व्यक्त गर्नपनि कार्यसमितिको बैठक बस्नुपर्ने हो’, आचार्यको भनाइ छ ।

प्रतिनिधिसभाको बैठक आह्वान भइसकेको अवस्थामा संसदमा पार्टीले निर्वाह गर्ने भूमिकाबारे निर्णय गर्न ढिलो भइसकेको भन्दै नेता आचार्यले अविलम्ब बैठक बोलाउन माग गरेका हुन् ।

प्रतिक्रिया

Leave a Reply

Your email address will not be published. Required fields are marked *