कबड्डी ४ : दयाहाङ, सौगात, बुद्धि र विजय मात्र फाइनल

काठमाडौं । कबड्डी सिरिजको चौंथो श्रृंखलाको मुख्य भूमिकामा दयाहाङ राई र सौगात मल्ल मात्र तय भएको निर्माताले जनाएका छन् ।

निर्माता मणिराम पोखरेलका अनुसार राई र मल्लसहित बुद्धि तामाङ, विजय बराल, पुष्कर गुरुङ, कविता आले मात्र फाइनल छन् । निश्चल बस्नेत चौंथो सिक्वेलमा नहुने निर्माता पोखरेलले बताए ।

रामबाबु गुरुङले निर्देशन गर्ने फिल्मको नाम ‘कबड्डी ४ : द फाइनल म्याच’ राखिएको छ । निर्माता पोखरेलले चाहिँ अन्तिम सिक्वेल नभएको बताए । ‘अन्य कलाकार तय छैनन्’ उनले भने, ‘हिरोइनमा चाहिँ नयाँ लिने सम्भावना छ ।’

रिस्मा गुरुङ सिक्वेलमा नहुनेतर्फ उनले संकेत गरे । आगामी दशैंलाई रिलिज लक्ष्य राखिएको छ । कबड्डी श्रृंखला निकै रुचाइएको नेपाली फिल्म हो ।