१० जनामा सीमित भएको एट्लान्टाको फाइदा उठाउन सकिएन: जिदान

काठमाडौं । प्रशिक्षक जिनेदिन जिदानले चोटले थलिएको रियाल मड्रिडले १० जनामा सीमित एट्लान्टाविरुद्ध राम्रो प्रर्दशन गर्न नसकेको बताएका छन् । तर, अन्तिम १६ को पहिलो लेगमा १–० को अवे गोलको अग्रता लिन सफल भएको बताएका छन् ।

गेविस स्टेडियममा बुधबार भएको खेलको १७औं मिनेटमा एट्लान्टाका मिडफिल्डर रेमो फ्रेलर रातो कार्डको सामना गर्दै मैदानबाट बाहिरिएका थिए ।
खेलमा राम्रो पकड बनाए पनि रियालले तीन पटक मात्र एट्लान्टाको गोल पोष्टमा प्रहार गरेको थियो ।
‘हामीले उत्कृष्ट खेल्न सकेनौं,’ जिदानले भने, ‘तर, महत्वपूर्ण कुरा नतिजा हो । खेलको अन्त्यमा भएको गोल हाम्रा लागि एकदमै महत्त्वपूर्ण थियो । ’

अझै दोस्रो लेग खेल्नु पर्ने भए पनि पहिलो लेगमा १–० अवे गोलको अग्रता सुखद् भएको प्रशिक्षक जिदानले बताएका छन् ।