भिसाको म्याद सकिनुअघि काममा नफर्किने कामदारलाई साउदी अरबमा तीन वर्ष प्रतिबन्ध – Nepal Press

भिसाको म्याद सकिनुअघि काममा नफर्किने कामदारलाई साउदी अरबमा तीन वर्ष प्रतिबन्ध

काठमाडौं । साउदी सरकारले बिदामा रहेको आप्रवासी कामदार भिसाको अवधि सकिनुअघि नै काममा नफर्किएमा तीन वर्षसम्म देशभित्र प्रवेश गर्न नपाउने गरी प्रतिबन्ध लगाएको छ । पूनः प्रवेश भिसामा नयाँ व्यवस्था लागू गर्दै सरकारले यस्तो प्रतिबन्ध लगाएको हो ।

रियादस्थित नेपाली राजदूतावास ले वैदेशिक रोजगार विभागलाई पत्राचार गरेपछि विभागले आइतबार साँझ सूचना जारी गरी यसको जानकारी गराएको छ । तर जुन कम्पनीबाट पुनः प्रवेश भिसामा गएको हो, त्यसै कम्पनीमा नयाँ भिसामा आउन अनुमति पाएमा उक्त अवधिअघि आउन बाधा नपर्ने साउदी अरेबियाको अध्यागमन कार्यालयलाई उद्धृत गर्दै विभागले जनाएको छ ।

पछिल्लो केही दिनयता साउदी अरबमा कोरोना संक्रमितको संख्या बढ्न थालेपछि सरकारले संक्रमण कम गर्न स्वास्थ्य प्रोटोकलमा पनि कडाइ गरेको छ । व्यापारिक मलमा जाने हरेकले मलमा प्रवेश गर्नुपूर्व साउदी सरकारले उपलब्ध गराएको तावाक्कालाना मोबाइल एप्स आफ्नो मोबाइलमा अनिवार्य डाउनलोड गरेको हुनुपर्नेछ ।

साउदी सरकारले यसअघि २०२१ मार्च २१ बाट हवाई, स्थल तथा जलमार्गबाट हुने सम्पूर्ण आवागमनमाथिको प्रतिबन्ध हटाउने निर्णय गरेकोमा यसलाई २०२१ मे १७ सम्मका लागि लम्ब्याइएको छ । यसैगरी विभिन्न २० देशबाट हुने आप्रवासी कामदारको आवागमनलाई समेत अस्थायी रुपमा स्थगित गरिएको छ ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर