कलाकारले राजनीति गर्नुहुन्न भन्नु अधिनायकवादी सोच : नेपथ्य गायक अमृत गुरुङ

काठमाडौं । संसद विघटन प्रकरणपछि कलाकार अलग-अलग ध्रुबमा विभाजित भइरहेका छन् । राजनीतिको यो विकसित घटनाक्रमको सीधा असर फिल्म, संगीत र कलामा देखिएको छ ।

यो क्रममा जोडिएका छन् चर्चित नेपाली पप ब्यान्ड नेपथ्य भोकलिस्ट अमृत गुरुङ । १३ फेब्रुअरीमा सामाजिक संजालमा एउटा पोस्ट गर्दै गायक गुरुङले लेखे -सडकमा भएका दिदीबहिनी र श्रष्टा मित्रहरुप्रति ऐक्यबद्धता । सत्ताको मात चढ्दैछ । अति हुँदैछ । घडा भरिँदैछ ।

उनले यो पोस्ट गरेपछि उनको विचारको पक्ष र विपक्षमा उनका प्रशंसक बाँडिए । हत्तपत्त राजनीतिक स्टेटमेन्ट नदिने गुरुङको विपक्षमा पनि थुप्रै सुझाव आए । उनलाई आलोचना गर्नेहरुले कलाकारले राजनीति गर्न नहुने सुझाए र गुरुङलाई त्यसो नगर्न आग्रह गरे ।

आलोचकलाई लक्षित गर्दै गुरुङले शुक्रबार अर्को ट्वीट गरे । कलाकारले राजनीति गर्नुहुँदैन भनेर भन्नेहरुलाई उनको जवाफ थियो –राजनीतिक चेतना सबैको नैसर्गिक अधिकार हो । यसमा बन्देज लाउने प्रयास नगर्नुहोला । अरुलाई समसामयिक राजनीतिक चासोबाट निरुत्साहित गर्न खोज्नु अधिनायकवादी सोचलाई समर्थन गर्नु हो ।

प्रधानमन्त्री केपी शर्मा ओलीले संसद विघटन गरेपछि त्यसको पक्षपातिले अग्रगमन र विरोधीले प्रतिगमन भन्दै प्रतिक्रिया दिने गरेका छन् ।