भारी हिमपातका कारण न्यूयोर्कमा कोरोना खोप कार्यक्रम प्रभावित

एजेन्सी । अमेरिकाको पूर्वी तटीय क्षेत्रमा उच्च हिमपात भएको छ । यसले त्यहाँका मानिसहरुको दैनिकीमा असर पारेको छ । पूर्वी क्षेत्रका हवाई सेवा बन्द गरिएको छ भने न्युयोर्कमा कोरोना खोप कार्यक्रममा समेत असर पुगेको छ ।

अमेरिकी समयअनुसार सोमबार साँझसम्म न्युजर्सी र पेन्सिलभेनियामा ४८ सेन्टिमिटरसम्म हिउँ जमेको छ भने न्युयोर्क सिटीमा ४३ सेन्टिमिटरसम्म जमेको छ । न्युयोर्क र न्युजर्सीले राज्यमा आपतकालको घोषणा गरेका छन् ।

अघिल्ला केहि दिन मौसमको अवस्था यस्तै रहने पूर्वानुमान भएका छन् । ८० किलोमिटर प्रतिघण्टाको दरले हावा चल्नेछ । केहि स्थानमा हिम आँधीको पनि सम्भावना देखाइएको छ ।

तीव्र हावाका कारण मानिसलाई घरबाट बाहिर निस्कन समस्या भएको छ । न्युयोर्कका मेयर विल डी ब्लासियोले अत्यावश्यकबाहेक अन्यलाई घरबाट ननिस्कन भनेका छन् । सरकारी बिद्यालय मंगलबारदेखि बन्द गर्ने निर्णय भएको छ ।