सिंहदरबार अगाडि उभिनु मात्रै शक्तिप्रदर्शन होइन : विश्वप्रकाश (भिडियो सहित)

काठमाडौं । नेपाली कांग्रेसका प्रवक्ता विश्वप्रकाश शर्माले सिंहदरबारको अगाडि उभिनुमात्रै शक्तिप्रदर्शन नभएको बताएका छन् ।

कांग्रेस केन्द्रीय समितिको बैठकपछि पत्रकारहरुसंग कुराकानी गर्दै प्रवक्ता शर्माले संसद विघटनविरुद्ध देशका हरेक कुनामा जनमत अभिव्यक्त हुनुपर्ने बताए ।

संसद विघटनविरुद्ध कांग्रेसले गरेको आन्दोलनलाई कमजोर नआँक्न आग्रह गर्दै प्रवक्ता शर्माले देशभरका वडा– वडामा सरकारको कदम विरुद्ध कांग्रेसले आवाज उठाएको बताए ।

‘कांग्रेसको आन्दोलन कमजोर होइन । सिंहदरबार अगाडि उभिनुमात्रै शक्तिप्रदर्शन होइन । हरेक वडा– वडामा जनता उतारेर कांग्रेसले वास्तविक शक्ति प्रदर्शन गरेको छ ’, शर्माले भने ।

उनले आन्दोलनका विभिन्न शैली हुने भन्दै अहिले कांग्रेस देशव्यापी आन्दोलनमा रहेको र आवश्यकता अनुसार काठमाडौं केन्द्रीत प्रदर्शन पनि हुने बताए ।