‘हराएका’ ज्याक मा पुनः सार्वजनिक जीवनमा देखिए

काठमाडौं । केही महिना सार्वजनिक जीवनदेखि गुमनाम चिनियाँ धनाढ्य एवं अलिबाब संस्थापक ज्याक मा पुनः सार्वजनिक रुपमा देखापरेका छन् । उनी महिनौं हराएपछि चीन सरकारले गायब पारेको हुनसक्ने अनुमान गरिएको थियो ।

आफ्नो कम्पनी अलिबाबको हङकङ सेयर बजार ८ प्रतिशतले बढेको खबरसँगै ज्याक माको पुनरागमन भएको हो ।

चिनियाँ सामाजिक संजालमा पोस्ट गरिएको एक भिडियोमा ज्याक माले ग्रामिण शिक्षकलाई मन्तव्य दिएको देख्न सकिन्छ । अलिबाबाको सामाजिक सुधार कार्यक्रमको एक हिस्साअन्तर्गत उक्त समारोह भएको थियो जसलाई ज्याक माले सम्बोधन गरे ।

चीनको पर्यटकीय थलो सान्याको एक रिसोर्टमा भएको उक्त कार्यक्रमलाई अलि बाबा कम्पनीले ग्रामिण शिक्षाको उपलब्धीको बारेमा मनाएको थियो । उक्त कार्यक्रममा शिक्षकलाई नगदले पुरस्कृत पनि गरियो ।

केही महिना ज्याक मा सार्वजनिक कार्यक्रममा देखिएनन् । तर, उनी उक्त समयमा लो–प्रोफाइलमा थिए । चीन सरकारले अलि बाबा कम्पनीको एकाधिकारविरुद्ध कम्पनीमा छापा मारेको चर्चा पनि थियो । माले सरकारको एकाधिकार कानुनविरुद्ध अभिव्यक्ति पनि दिएका थिए ।