ट्रम्पका जत्थाले पुनः हिंसा भड्काउन सक्ने एफबीआईको चेतावनी

एजेन्सी । अमेरिकाको राष्ट्रिय सुरक्षा एजेन्सी एफबीआईले जोय बाइडेनले राष्ट्रपति पदको सपथ लिनुअघि अमेरिकाभर वर्तमान राष्ट्रपति ट्रम्प समर्थित जत्थाहरुको हिंसात्मक आक्रमणको सम्भावना औल्याएको छ ।

एफबीआईको दावी अनुसार ट्रम्प समर्थिक यो समूह जोय बाइडेनको सपथको दिन अर्थात जनवरी २० मा अमेरिकाका ५० राज्यको राजधानी र केन्द्रीय राजधानी वासिंटन डिसीमा एकत्रीत हुने योजनामा छन् ।

सम्भावित हमलाका लागि सुरक्षा संगठनहरु योजना बनाइरहेका छन् । राष्ट्रपति निर्वाचित बाइडेनले सोमबार पत्रकारहरुसँग कुरा गर्दै क्यापिटल हिलको बाहिर सपथ लिन आफूलाई कुनै भय नरहेको बताएका थिए ।

चुनावमा आफू अनुकुल परिणाम नआएपछि राष्ट्रपति ट्रम्पका कट्टरपन्थी समर्थकको हिंसात्मक आक्रमणमा अमेरिकी संसदभित्र ५ जनाको मृत्यु भएको २ सातापछि जनवरी २० मा सोही स्थानमा राष्ट्रपति निर्वाचित बाइडेन र उपराष्ट्रपति निर्वाचित कमला ह्यारिसले सपथ लिँदैछन् ।

सुरक्षा अधिकारीहरुले निश्चिन्त पारेका छन् कि गएको सोमबारको जस्तो घटना दोहोरिने छैन । अमेरिकी कंग्रेसका सदस्यले चुनावी परिणामको प्रमाणित गर्न मतदान गरिरहेको समयमा हजारौंको संख्याको जत्थाले आक्रमण गरेको थियो ।