दाहाल आज स्वदेश फर्कँदै

काठमाडौं । पत्नीको उपचारका लागि भारत पुगेका पूर्वप्रधानमन्त्री एवं नेकपा अध्यक्ष पुष्पकमल दाहाल आज शनिबार स्वदेश फर्कने भएका छन् । उनी छोरी रेणुको साथ दिउँसो नेपाल वायुसेवा निगमको जहाजमा आउन लागेका हुन् ।

उनी सोमबार पत्नी सीता दाहालको उपचारका लागि नयाँ दिल्ली हुँदै मुम्बई गएका थिए । दाहालसँगै छोरी रेणु र गंगा पनि त्यसतर्फ गएका थिए । लामो समयदेखि वंशाणुगत पार्किन्सनजस्तो देखिने रोगबाट पीडित सीताको मुम्बईको न्यूरोजोन ब्रेन एन्ड स्पाइन इन्स्टिच्युटमा उपचार भइरहेको छ ।

छोरी गंगाका अनुसार सीतोको शुक्रबार स्टेम ट्रान्सप्लान्ट गरिएको थियो र स्वास्थ्य अवस्था सुधारोन्मुख छ । ‘तर, जटिल रोग भएकाले ठीक हुन समय लाग्ला’ उनले भनिन् । मुम्बइमा रहँदा दाहालले राजनीतिक भेटघाट गरेको चर्चा चलेको थियो । तर, गंगाले कुनै राजनीतिक भेटघाट नभएको बताइन् । काठमाडौंबाट सीधै मुम्बइको उडान नभएकाले दाहाल परिवार नयाँ दिल्ली हुँदै गएको थियो ।