नेपाली र्‍यापर लाउरेको कन्सर्टमा भागदौड, दुई जनाको मृत्यु – Nepal Press

नेपाली र्‍यापर लाउरेको कन्सर्टमा भागदौड, दुई जनाको मृत्यु

भारतको पश्चिम बंगालस्थित कालेबुङ मैदानमा आयोजना भएको नेपाली चर्चित र्‍यापर आशिष राना लाउरेको कन्सर्टमा भागदौड हुँदा दुई जनाको मृत्यु र पाँच जना गम्भीर घाइते भएका छन् । गेटमा भीड हुँदा भागाभाग भएपछि लडेर त्यही भीडले कुल्चिँदा एक महिलाको मृत्यु भएको पश्चिम बंगाल प्रहरीले जनाएको छ । भागदौडमा ३९ वर्षीया विनिता गुरुङ र ४६ वर्षीया अनिता क्षेत्रीको मृत्यु भएको छ ।

म्याड डग नामक संस्थाले आयोजना गरेको कन्सर्टमा नेपाली अभिनेता एवं र्‍यापर लाउरेले प्रस्तुति दिएका थिए । प्रहरीका अनुसार लाउरेले गाइसकेपछि एक्कासी कन्सर्टको प्रवेशद्धारा खोलिंदा धेरै मानिस सिंढीमा लडेका थिए । घाइतेलाई कालेबुङ अस्पतालमा उपचारार्थ लगिएको थियो । घाइतेमध्ये अमिता सुब्बा र मिक्सम तामाङको गम्भीर अवस्थामा सिलुगढी अस्पतालमा उपचार भैरहेको छ ।

प्रतीक्षा क्षेत्री, एलिसा राई र परिमा राईको कालेबुङ जिल्ला अस्पतालमा उपचार भैरहेको छ । घटनालाई लिएर सांसद राजु विष्ट र चर्चित गायक विपुल क्षेत्रीले मृतकप्रति श्रद्धाञ्जली व्यक्त गरेका छन् । उनीहरुले घटनाको छानबिन गर्न पनि माग गरेका छन् । सांसद विष्टले प्रहरीले लाठीचार्ज गर्दा भागदौड मच्चिएको उल्लेख गर्दै घटनामा प्रहरी दोषी देखिएको भनेका छन् ।

सांसद विष्टले पश्चिम बंगालकी मुख्य मन्त्री ममता बेनर्जीलाई पत्र लेख्दै घटनाको निष्पक्ष छानबिन गर्न माग गरेका छन् । पत्रमा उनले कोभिड प्रोटोकल उल्लंघन गर्दै प्रशासनले सांगीतिक कार्यक्रमका लागि अनुमति दिएको आरोप समेत लगाए । घाइतेहरुको निःशुल्क उपचार गर्न माग गरिएको छ ।

प्रतिक्रिया

Leave a Reply

Your email address will not be published.