प्रचण्ड–माधवको पक्षको स्थायी कमिटीः स्थानीय कमिटीमा छिटै पदपूर्ति गर्ने – Nepal Press

प्रचण्ड–माधवको पक्षको स्थायी कमिटीः स्थानीय कमिटीमा छिटै पदपूर्ति गर्ने

स्थानीय तह र जिल्लाको अवस्थाबारे ‘रिर्पोटिङ’ 

काठमाडौं । नेपाल कम्युनिष्ट पार्टी (प्रचण्ड–माधव पक्ष)ले स्थानीय कमिटीमा खाली भएका पदपूर्ति चाँडै गर्ने भएको छ ।

पार्टीमा विभाजनमा आएर दुई पक्ष भएपछि स्थानीय कमिटीहरु नेतृत्वविहीन भएका छन् । प्रतिनिधिसभा विघटनविरुद्ध आन्दोलनमा उत्रिएको प्रचण्ड–माधव पक्षले स्थानीय कमिटीहरुलाई जोड दिएको हाे ।

आइतबार पेरिसडाँडामा बसेको स्थायी कमिटी बैठकले तत्कालै ती खाली पदमा नेतृत्व व्यवस्थापन गर्ने विषयमा छलफल गरेको हो। ‘आन्दोलनमा स्थानीतहसम्मको संगठन परिचालन गर्ने र त्यसका लागि सबैतिर तत्कालै संगठन परिचालकहरु जाने गरी छलफल भएको छ’ बैठकबारे जानकारी दिंदै स्थायी कमिटी सदस्य लीलामणि पोखरेलले नेपाल प्रेससित भने, ‘स्थानीय तहमा नेतृत्व खाली भएको ठाउँमा त्यहाँको राय, सल्लाहका आधारमा व्यवस्थापन गर्ने कुरा भएको छ ।’

यी विषयलाई औपचारिकता दिन भोलि १२ बजे पुनः स्थायी कमिटी बैठक बस्ने भएको छ ।

‘यी सबै कुराहरुलाई अन्तिम रुप दिन चाहिं भोलि फेरि बैठक बस्दैछ’ पोखरेलले भने, ‘आज छलफल भयो । सबै निष्कर्ष भोलि आउँछ ।’ प्रचण्ड–माधव पक्षले शनिबार दोस्रो चरणको आन्दोलनका कार्यक्रम सार्वजनिक गर्दै स्थानीय तहलाई नै बढ्ता जोड दिएको थियो ।

बैठकमा पहिलो चरणको आन्दोलन र त्यसले पारेको प्रभावबारे पनि छलफल भएको थियो । दिउँसो साढे एक बजेदेखि शुरु भएर दिउँसो पौनै चारबजेसम्म चलेको बैठकमा स्थायी कमिटी सदस्यहरुले पार्टीमा विभाजन आएपश्चात स्थानीय तह र जिल्लाहरुमा के कस्तो अवस्था छ भन्नेबारे ‘रिपाेर्टिङ’ गरेका थिए ।

प्रतिक्रिया

Leave a Reply

Your email address will not be published.

सम्बन्धित खवर