मतदान केन्द्र थपघट हुँदै, पुस ५ गतेसम्म १८ वर्ष पुगेका नयाँ मतदाता सूचीमा – Nepal Press
निर्वाचन आयोग

मतदान केन्द्र थपघट हुँदै, पुस ५ गतेसम्म १८ वर्ष पुगेका नयाँ मतदाता सूचीमा

काठमाडौं । निर्वाचन आयोगले वैशाख १७ र २७ गतेलाई तोकिएको प्रतिनिधिसभा निर्वाचनलाई लक्षित गरेर देशभरका मतदान केन्द्रहरु थपघट गर्ने भएको छ । मतदान केन्द्रहरुहरुको पुनरावलोकनका लागि आइतबार आयोगको बैठक बस्दैछ ।

निर्वाचन आयोगका प्रमुख आयुक्त दिनेश थपलियाले संसदको राज्य व्यवस्था समितिले पनि यसअघि नै मतदान केन्द्र पुनरावलोकन गर्न निर्देशन दिएकाले सबै अवस्था विचार गरेर कतिपय फेरबदल हुने बताए । त्यसका लागि आयोगले कार्यविधि स्वीकृत गर्दैछ ।

‘हामी मतदान केन्द्र पुनरावलोकन गर्दैछौं । कतिपय केन्द्र नजिक छन् भने गाभिन्छन्, अपायक छ भने थपिन्छन्’ नेपाल प्रेससँग कुरा गर्दै प्रमुख आयुक्त थपलियाले भने, ‘राज्यव्यवस्था समितिले पनि हामीलाई भनेको छ । मतदान केन्द्रको टुंगो लगाएपछि नयाँ मतदाताको नाम पठाउनुपर्ने हुन्छ ।’

२०७४ मा सम्पन्न प्रतिनिधिसभा र प्रदेशसभा निर्वाचनमा कतिपय मतदान केन्द्र अपायक भएको भन्दै संसदीय समितिले पुनरावलोकन गर्न निर्देशन दिएको थियो । उक्त चुनावमा देशभर १० हजार ६७१ स्थानमा १९ हजार ८०९ मतदान केन्द्र राखिएका थिए ।

यसपटक मतदान केन्द्रको संख्या बढ्न सक्ने आयोग स्रोतले जनाएको छ । आयोगले सामान्यतः एउटा मतदान केन्द्रमा करीब १ हजार मतदाता हुनुपर्ने मापदण्ड बनाएको छ । तर भौगोलिक विकटता, जनसंख्यालाई समेत हेरेर केन्द्रहरु निर्धारण गरिने आयोगले जनाएको छ ।

आयोगले मतदान केन्द्र टुंगो लगाएसँगै थपिएका नयाँ मतदाताहरुको नाम पनि अद्यावधिक गर्ने थपलियाले बताए । प्रतिनिधिसभा विघटन भएको दिन अर्थात् २०७७ पुस ५ गते रातिसम्म १८ वर्ष उमेर पुगेका र आयोगमा जिल्ला प्रशासनहरुबाट आएका नाम स्वतः मतदाता सूचीमा पर्नेछन् ।

थपलियाले थपे- ‘हामीकहाँ मतदाता नामावली सधैं अद्यावधिक भइरहेको हुन्छ । १६ वर्ष पुगेको मान्छे जिल्ला प्रशासनबाट नागरिकता लिएपछि उसको नाम आयोगमा आउँछ । पुस ५ गते रातिसम्म १८ वर्ष पुगेकाहरु नयाँ मतदाता भएर आउँछन् । तर अब निर्वाचनको मिति घोषणापछि नयाँ मतदाता नामावली संकलन र मतदाता नामावली सार्न पाइँदैन ।’

प्रतिक्रिया

Leave a Reply

Your email address will not be published. Required fields are marked *

सम्बन्धित खवर