कृष्णगोपाल भन्छन्– प्रचण्ड–माधव नेपाललाई एक एक थान सूर्य दिन्छौं

ललितपुर । शिक्षा मन्त्री कृष्णगोपाल श्रेष्ठले प्रचण्ड–माधव नेपाललाई सूर्य चिन्ह चाहिएको हो भने आउने चुनावमा एक एक क्षेत्रमा आफूहरुले सूर्यबाट चुनाव लड्न दिने टिप्पणी गरेका छन् ।

ललितपुरमा आयोजित कार्यकर्ता भेलामा ओली पक्षीय नेकपाका उपत्यका इन्चार्ज समेत रहेका श्रेष्ठले पार्टीको आधिकारिकता र सूर्य चिन्ह भने आफूहरुसँगै रहेको दाबी गरे ।

श्रेष्ठले भने, ‘हामी आउने चुनावमा प्रचण्ड र माधव नेपाललाई एक एक थान सूर्य दिन सक्छौं । तर बाटोमा मागेर पाइँदैन । उहाँहरुले केपी ओलीलाई हटायौं भन्नु घरबेटीलाई पाहुनाले घरबाट निकालेँ भने जस्तै हो ।

महानगर कमिटीले आयोजना गरेकाे कार्यक्रममा विघटित प्रतिनिधिसभाका सांसद नवराज सिलवाल, सुशीला नेपाल, राष्ट्रियसभा सदस्य कोमल वली, नेकपा ललितपुर जिल्ला अध्यक्ष हरिकृष्ण ब्यन्जनकार लगायतले पार्टी विभाजन नभएकाले कार्यकर्तालाई नअलमलिन आह्वान गरेका थिए ।