नयाँ कोरोनाभाइरस भेटिएपछि दिल्लीमा कर्फ्यु

दिल्ली /नयाँ प्रजातिको कोरोनाभाइरस संक्रमणको डरले दिल्लीमा रात्रीकालिन कर्फ्यु घोषणा गरिएको छ । दिल्ली सरकारले अंग्रेजी नयाँवर्ष २०२१ को छेकोमा संक्रमण फैलिने भन्दै विहिबार र शुक्रबार निषेधाज्ञा घोषणा गरेको हो ।

नयाँवर्ष मनाउन मानिसहरुले रात्री समयमा भीडभाड गर्ने र त्यसले संक्रमण फैलाउन मद्दत गर्ने भएपछि कर्फ्यु लगाउनुपरेको जनाइएको छ ।

दिल्ली विपद व्यवस्थापन प्राधिकरणले डिसेम्बर ३१ को राती ११ बजेदेखि बिहान ६ बजे र जनवरी १ को राती ११ बजेदेखि भोलिपल्ट ६ बजेसम्म कर्फ्यु लागु गर्ने जनाएको हो । सार्वजनिक स्थलमा पाँचजनाभन्दा बढी भेला हुन र नयाँवर्षको कुनैपनि उत्सव, कार्यक्रम र समारोह राती नगर्न भनिएको छ ।

दिल्लीका आठ जनामा नयाँ प्रकारको कोरोनाभाइरस फेला परेपछि यस्तो आदेश गर्नुपरेको जनाइएको छ । पछिल्लो समय दिल्लीमा कोभिड संक्रमण कम हुँदै गएको छ । बुधबार मात्रै दिल्लीमा ७०३ जना संक्रमित थपिएका थिए ।