संसद विघटन असंवैधानिक हो तर अब चुनाव नै ठीक : महत – Nepal Press

संसद विघटन असंवैधानिक हो तर अब चुनाव नै ठीक : महत

काठमाडौं । नेपाली कांग्रेसका सहमहामन्त्री डा. प्रकाशशरण महतले प्रतिनिधि विघटनसम्बन्धी विषयमा सर्वोच्चले छिट्टै न्याय निरुपण गर्ने विश्वास व्यक्त गरेका छन् ।

नेपाली कांग्रेसको काठमाडौं क्षेत्र नम्बर ५ समितिले आयोजना गरेको विरोध सभामा बोल्दै महतले कांग्रेसका दृष्टिमा संसद विघटन असंवैधानिक र अलोकतान्त्रिक कदम रहेको बताए ।

‘संविधानमा प्रधानमन्त्रीले चाहँदैमा संसद विघटन हुने व्यवस्था छैन । त्यसैले यो असंवैधानिक र अलोकतान्त्रिक छ । हामी आन्दोलनमा छौं तर यसको न्यायिक निरुपण अदालतले गरोस्’, महतले भने ।

संसद विघटन असंवैधानिक भए पनि अब निर्वाचनको तयारी गर्नुपर्ने महतको भनाइ छ । संसद पुनःस्थापित भए जनता अझै दुई वर्ष कम्युनिष्ट सरकार भोग्न बाध्य हुने भन्दै नेता महतले निर्वाचन भए कांग्रेसको जित निश्चित रहेको बताए । ‘अब निर्वाचनका लागि दबाब बढाउनुपर्छ । निर्वाचनबाटै कम्युनिष्ट सरकारलाई विस्थापित गर्नुपर्छ’, महतको भनाइ थियो ।

नेकपाभित्रको सत्ता संघर्षकै कारण संसद गुमेको प्रसंग केलाउँदै नेता महतले जहिले भए पनि कांग्रेसले चुनावको तयारी गर्नुपर्ने बताए । चुनावबाट नै कम्युनिष्ट सरकारका कदमविरुद्ध जनताले मत व्यक्त गर्ने महतको भनाइ थियो ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर
नेपाल अपडेट ट्रेन्डिङ