देउवालाई आन्दोलनमा जान दबाब दिन रामचन्द्र पौडेल पक्षको भेला

काठमाडौं । पार्टीको जारी केन्द्रीय कार्य समिति बैठकमा प्रतिनिधिसभा विघटनविरुद्ध आन्दोलनमा जाने कि सर्वोच्च अदालतको फैसला पर्खिने भन्ने विवाद चर्किरहेका बेला नेपाली कांग्रेसमा गुटका भेला शुरु भएका छन् ।

सभापति शेरबहादुर देउवा सरकारविरुद्ध आन्दोलन गर्न अनिच्छुक देखिएपछि रामचन्द्र पौडेल पक्षले दबाब बढाउन अलग्गै भेला गरेको हो ।

काठमाडौंमा जारी भेलामा पार्टीलाई आन्दोलनमा लैजानका लागि बैठकबाट निर्णय गराउन कसरी प्रस्तुत हुने भनेर छलफल चलेको एक नेताले बताए ।

बैठकमा रामचन्द्र पौडेल,महामन्त्री शशांक कोइराला, प्रकाशमान सिंह, गगन थापा लगायतका नेताहरु सहभागी छन् । डा शेखर कोइराला र महेश आचार्य पनि बैठकस्थलमा पुग्दैछन् ।

बैठकमा पौडेल पक्षका अधिकांश नेताहरु सहभागी रहेको बताइएको छ । कांग्रेस बैठक आज अपरान्ह पुनः बस्दैछ । हिजो आन्दोलन कि चुनावको तयारी भन्ने विषयमा विवाद हुँदा नेताहरुबीच भनाभन समेत भएको थियो ।