सरकारले उखु किसानलाई ५० प्रतिशत रकम तत्काल भुक्तानी गर्ने – Nepal Press

सरकारले उखु किसानलाई ५० प्रतिशत रकम तत्काल भुक्तानी गर्ने

काठमडौं । उखु किसान संघर्ष समितिले आइतबार नेपाल सरकारसँग वार्ता गरेको छ । आइतबार भएको वार्तामा सरकारले किसानहरुले पाउनु पर्ने बक्यौता रकममध्ये हाल ५० प्रतिशत रकम किसानका खातामा जम्मा गर्दिने प्रस्ताव गरेको छ ।

‘किसानले चिनी उद्योगबाट पाउनु पर्ने बक्यौता रकमको ५० प्रतिशत रकम किसानका खातामा जम्मा गर्दिने प्रस्ताव मन्त्रालयका पदाधिकारीले गर्नु भयो । तर, हामीले शतप्रतिशत रकम नै किसानका खातामा जानु पर्छ भनेका छौं,’ किसान संर्घष समितिका संरक्षक राकेश मिश्राले भने ।

किसानले चिनी उद्योगबाट ९० करोड रुपैयाँ पाउनु पर्ने दावी गरेका छन् । तर, सरकारले ६५ करोड रुपैयाँ बक्यौता भएको आकलन गरेको छ । किसानले पाउनु पर्ने दावी रकममध्ये बाँकी रकमका लागि सरकारले एउटा कार्यदल बनाएर त्यसको अनुसन्धान गर्ने भएको छ ।

सरकारले अहिले आकलन गरेको ६५ करोड रुपैयाँबाट ५० प्रतिशत किसानका खातामा पठाउने प्रस्ताव गरेको संरक्षक मिश्राले जानकारी दिए । उनका अनुसार सो ६५ करोडमध्ये रौतहटस्तिथ श्रीराम सुगर मिलले १६ करोड र अन्नपूर्ण र इन्द्रा सुगर मिलले दिने ८ करोड जम्मा २४ करोड रुपैयाँ तत्काल किसानका खातामा जम्मा गर्न उद्योग मन्त्रालयल तयार भएको छ ।

तर, त्यो पैसा कति किसानले कति दिनमा प्राप्त गर्ने हो त्यसको निश्चित समय तोक्नु पर्ने किसानको माग छ ।
मिश्राका अनुसार अन्य रकम भुक्तानीका लागि सरकारले किसानसँग केही समय मागेको छ ।तर, अन्य रकमका लागि सरकारले कहिलेसम्म किसानलाई भुक्तानी गर्ने हो त्यसको निश्चित दिन तोकिनु पर्छ।

यदी किसानले सरकारले तोकेको समयमा रकम नपाएमा त्यसको जिम्मेवार सरकार हुने कि नहुने ? त्यसको पनि सुनिश्चितता हुनुपर्ने र त्यसका लागि सरकार नै ग्यारेण्टी बस्नु पर्ने किसानले माग गरेका छन् ।

 

प्रतिक्रिया

Leave a Reply

Your email address will not be published.