कवि गाउँले अब गीतकार (भिडियो)

केटी : बालो जोबन सुम्प्याँ मैले बाला साइका हात,
केटा : ज्यान गया लै मेरी सुवा छोड्न्याँ छैन साथ…

सुदूरपश्चिम प्रदेशको स्थानीय लवजमा लेखिएको यस गीतलाई आधुनिक लयमा ढाल्ने प्रयास गरिएको छ । प्रेम समर्पणको भाव बोकेको गीत ‘बालो जोबन’ इन्टरनेट रिलिज भएको छ । शब्दहरु सोझो गाउँलेले कोरेका हुन् । गीतमा विष्णु भट्टले सङ्गीत भरेका छन् । थारु गीतकी गायिका अन्नु चौधरी र विष्णु भट्टले यसमा स्वर दिएका छन् ।

केटी : रानीलेक हिउँ पड्याको राई सल्लो ढल्याको
साई तम्रा सासले मेरो धुकधुकी चल्याको ।
केटा : पिपलबोट पिङ हाल्याको एक डोरी चुन्ड्याको
सुवाका घाँटीउँदो मेरो परानी झुन्ड्याको ।

लामो समयदेखि शिक्षा क्षेत्रमा काम गरिरहेका सुदूरपश्चिमकै केशव गिरीले यसलाई बजारमा ल्याएका हुन् । भिडियोमा याम गुरुङको निर्देशन र वीरेन्द्र भाटको सम्पादन छ भने महेश महराले क्यामरा चलाएका छन् । मस्कोमा आयोजित ‘प्रिन्सेस अफ दि युनिभर्स (२०१७) की विजेता रक्षा थापा, २०१९ कि नेपाली मिस टिन प्रतिभा रानी राई, रङ्गकर्मी जीवनजङ्ग थापा र कान्ती बाल अस्पतालका चिकित्सक राजु गिरीको यसमा अभिनय रहेको छ ।

भाषा संस्कृतिको जगेर्ना गर्दै परिस्थिति अनुसार परिवर्तन गर्दै जानुपर्छ भन्ने मान्यताका साथ देउडामा नयाँ प्रयोग गरिएको गीतलाई आफूले लागानी गरेको निर्माता गिरीको भनाइ छ । प्रतिभावान कलाकारलाई अवसर दिएको र उनीहरुले मिहिनेतका साथ खटेर काम गरेकाले गीत श्रोतादर्शकले रुचाइदिने विश्वास उनको रहेको छ ।