थोरै सुन धितो राखेर धेरै ऋण लिने तीनजना पक्राउ, बैंकका कर्मचारीको मिलेमतो
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2020/12/crime-pakrau.jpg)
काठमाडौं । महालक्ष्मी विकास बैंक सातदोबाटोमा थोरै सुन धितोमा राखी बढी ऋण प्रवाह भएपछि प्रहरी कारवाही शुरु भएको छ ।
नेपाल प्रहरीको केन्द्रीय अनुसन्धान ब्युरो (सिआइबी)मा परेको उजुरीका आधारमा बिहीबार तीन आरोपी नियन्त्रणमा लिइएको सिआइबी स्रोतले जनायो ।
पक्राउ पर्नेमा ललितपुर निवासी राई थरका तीन व्यक्ति छन् ।
ब्युरोका एसपी उमाप्रसाद चतुर्वेदीको टोलीले ती व्यक्ति पक्राउ गरेको हो । अनुसन्धान जारी रहेको र अन्य अभियुक्त पक्राउ पर्न बाँकी भएका कारण सिआइबीले यसबारे समाचार सार्वजनिक गरेको छैन ।
नेपाल प्रेसले ब्युरोका प्रवक्ता एसपी बेलप्रसाद पाण्डेलाई सोध्दा उनले थप विवरण आउन केही समय लाग्ने बताए । बैंकका कर्मचारीको समेत मिलेमतो भएको हुनसक्ने पाण्डेले बताए । कर्मचारीमाथि पनि छानबिन हुने उनको भनाइ छ ।
स्रोतका अनुसार एकजना कर्मचारी फरार छन् ।