संवैधानिक परिषद्ः अध्यादेशप्रति कांग्रेस असन्तुष्ट, देउवा बैठकमा नजाने

काठमाडौं । प्रमुख प्रतिपक्षी दलका नेता एवं नेपाली कांग्रेसका सभापति शेरबहादुर देउवा आज साँझ बोलाइएको संवैधानिक परिषद्को बैठकमा उपस्थित नहुने भएका छन् ।

विपक्षी दलको नेताको हैसियतामा संवैधानिक परिषद्को सदस्य रहेका देउवा आज बिहान बसेको परिषद्को बैठकमा सहभागि थिए ।

परिषद्का सदस्य रहेका सभामुख अग्निप्रसाद सापकोटा अनुपस्थित भएपछि परिषद बैठक औपचारिक रुपमा बस्न सकेको थिएन । सरकारले संवैधानिक परिषद्सम्बन्धी अध्यादेश जारी गरेका कारण कांग्रेस बैठकमा उपस्थित नहुने भएको हो ।

कांग्रेसले अध्यादेशबाट देश चलाउन खोज्नु प्रधानमन्त्रीको गल्ती भएको जनाएको छ । अध्यादेश जारी भएपछिको राजनीतिक अवस्थाबारे अहिले देउवाले निकट नेताहरुसंग परामर्श गरिरहेका छन् । सभापति देउवानिकट एक नेताले संवैधानिक परिषद्को गरिमा घटाउने गरी अध्यादेश ल्याइएको भन्दै सभापति देउवा उपस्थित नहुने जानकारी दिए ।