जग्गा विवादले ४ वर्षदेखि बन्द बर्थिङ सेन्टर सञ्चालनमा

बझाङ । बझाङको तलकोट गाउँपालिका-२ ढुङ्गानामा रहेको बर्थिङ सेन्टर स्थापना भएको ४ वर्षपछि सञ्चालनमा आएको छ । जग्गा विवादका कारण ४ वर्षदेखि बन्द भएको बर्थिङ सेन्टर सञ्चालनमा आएको हो ।

तलकोट गाउँपालिकाको करिब २५ लाखको लागतमा निर्माण गरिएको उक्त बर्थिङ सेन्टर उद्घाटन नहुँदै विवादमा आएको थियो ।

लामो समयदेखि गाउँमा बर्थिङ सेन्टर अलपत्र परेको र सुत्केरी महिलाको समस्या यथावत रहेको गुनासो आएपछि गाउँपालिकाले जग्गाधनीसँग समन्वय गरेर बर्थिङ सेन्टर सञ्चालनमा ल्याएको हो ।

गाउँमा सुत्केरी व्यथा लागेका महिलालाई बोकेर टाढा रहेको स्वास्थ्य संस्थामा लिनुपर्ने बाध्यता रहेकोमा अब गाउँमै बर्थिङ सेन्टर सञ्चालन भएपछि सहज हुने स्थानीयवासीले अपेक्षा गरेका छन् ।

गाउँपालिका उपाध्यक्ष पार्वती कुँवर भण्डारीले उक्त बर्थिङ सेन्टरको उद्घाटन गर्दै बर्थिङ सेन्टर सञ्चालनमा आएकाले महिलाहरूलाई सहज हुने बताइन् ।

उक्त बर्थिङ सेन्टरमा १-१ अहेव, अनमि र कार्यालय सहयोगी गरी तीन जना कर्मचारी राखिएको वडाध्यक्ष जनक बोहराले बताए ।