राजावादीलाई शंकर पोखरेलको चुनौती- दुईतिहाइ ल्याएर संविधान उल्टाऊ, सडकमा तमासा नदेखाऊ (भिडिओ)

काठमाडौं । सत्तारुढ दल नेकपा एमालेका महासचिव शंकर पोखरेलले संविधानसभाले नै एकमतका साथ संस्थागतरूपमा राजतन्त्र अन्त्य गरेकाले अहिले राजा फर्काउँछु भन्नु असम्भव रहेको बताएका छन् ।

नेपाल प्रेससँगको कुराकानीमा उनले ज्ञानेन्द्र शाहलाई दलहरूले मौका दिएको तर उनले नै राजतन्त्र जोगाउन नसकेको टिप्पणी गरे ।

उनले भने’ , ‘राजा वीरेन्द्रको वंश विनाशपछि अपुतालीको रूपमा ज्ञानेन्द्रले मौका पाएकै हो नि, दलहरूले त्यो मौका उनलाई दिएकै हो नि । तर, उनले के गरे ? नेपाली समाजको आकांक्षाविपरीत दलहरूमाथि प्रतिबन्ध लाए, नेताहरूलाई थुन्ने काम गरे । मिडियामाथि प्रतिबन्ध लगाए । एकप्रकारले नेपाललाई सैनिक बुटको अधीनस्थ राख्नेखालको प्रयत्न गर्दा जनताको विद्रोहबाट ज्ञानेन्द्र सत्ताच्यूत भएका हैन र ?’

दलहरूले राजासँग सम्झौता गरेको भन्दै भ्रमको खेती गरेको उनले बताए । संविधान परिवर्तनीय रहेको स्मरण गर्दै उनले दुई तिहाइको जनादेश ल्याएर राजतन्त्र उल्टाउन राजावादीलाई चुनौती दिएका छन् ।

‘जननिर्वाचित संस्था संविधानसभाको पहिलो बैठकले संस्थागतरूपमा राजसंस्था अन्त्य गरेको हो । अँध्यारो कोठामा कसले के गर्‍यो भन्ने अर्थ छ र ? राजतन्त्र कि गणतन्त्र भन्ने एकप्रकारले संविधानसभाको सर्वसम्मत निर्णयबाट हल भयो’, महासचिव पोखरेलले भने, ‘कसैले चाहेर उल्टाउन खोज्नु भनेको जनादेशविरुद्ध उत्रिनु हो । त्यसलाई परिवर्तन गर्ने बाटो त संविधानले दिएकै छ नि त । जनादेश बदल्न नस्कने, सडकबाट तमास देखाएर बदल्छु भन्ने कुरा चाहिँ अब सम्भव छैन ।’

तर, पनि राजतन्त्रको पक्षमा पनि जनलहर त बढेकै देखिन्छ नि ? भन्ने प्रश्नमा महासचिव पोखरेलले जनमतका हिसाबले राप्रपाहरूले ल्याएको भोटभन्दा उपस्थिति कम भएको जिकिर गरे । स्वरमात्र ठूलो भएको उनको टिप्पणी छ ।

उनले थपे, ‘राप्रपाले जनमत नै नपाएको हो र ? सांसदहरू निर्वाचित भएका छन् । तर, ती सांसदहरूले पाएको भोटको आधारमा सडकमा आएका छन् त ? छैन । जनप्रतिनिधिको स्वीकार गर्ने कुरा र व्यवस्था बदल्ने कुरा त फरक कुरा हुन् । व्यवस्था बदल्नलाई जनमत सडकमा आइसक्यो भन्ने होइन । तर, एउटा संगठित शक्तिले प्रदर्शन गर्दा सडकमा मान्छे नआउने भन्ने पनि हुन्छ र ! आउँछन् ।’

गणतन्त्रपछि दलहरू सर्भिस डेलिभरिमा चुक्दा फ्रस्टेसन त बढ्दै छ त भनि हामीले उनलाई सोध्यौं- त्यसमा उनको जवाफ यस्तो छ-

राष्ट्रमा समस्या छन्, असन्तुष्टि छन्, गुनासा छन् । समाधान चैँ विकल्पको प्रणाली लोकतन्त्र हो । विकल्पहीनताको प्रणाली राजतन्त्र हो । समस्या छन् भने विकल्प त लोकतन्त्रभित्रै छ त । दलका नेताले कमजोरी गरे भने ५ वर्षपछि जनताले दण्डित गर्छन् । यही हैन र ? ८४ मा चुनाव आउँदै छ । कसलाई के चित्त बुझेको छैन, जनतामा गए भो नि त ! जान पाइन्छ । अहिले कांग्रेस-एमाले बेठिक हामी ठीक भन्नलाई बाटो कसैले छेकेको छ र ? जनतामा जाने, विश्वास आर्जन गर्ने र संविधान बदल्नु छ भने दुई तिहाइ प्राप्त गरेर बदल्ने । हामीले संविधान सक्रिय राजतन्त्रको जस्तो अपरिवर्तनीय त बनाएको छैन नि !

(महासचिव पोखरेलसँगको विस्तृत भिडिओ अन्तर्वार्ता प्रतीक्षा गर्नुहोस्)