बेलहिया नाकाबाट किट कलेजका पाँच जना विद्यार्थी घर फर्किए

रुपन्देही । भारतको ओडिसास्थिट किट कलेजबाट निकालिएका ५ विद्यार्थी रुपन्देहीको बेलहिया नाका हुँदै बुटवलमा रहेको घर फर्किएका छन् ।

किट कलेजबाट निकालिएका विद्यार्थीहरू नाका हुँदै घर फर्किएको जनाएका छन् । उनीहरु सबै त्यो कलेजका पहिलो वर्षमा अध्ययनरत विद्यार्थी हुन् ।

‘ओडिसाबाट कलकत्ता हुँदै गोरखपुर आएर अहिले बुटवलमा रहेको घरमा पुगियो, तनाबमा बाटोमा आउँदा निकै दुःख पाइयो, यताबाट गएको एकसाता पनि नहुँदै फर्किनुपर्यो’, विद्यार्थी सुयोग लम्सालले भने बताए । बुटवलका लम्सालसहित सुवास गैरे, सत्यम यादव, अमनकुमार जैसवाल, हेम पाण्डे आज अपरान्ह घरमा आएका हुन् ।

बेलहिया नाकामा सबै रेकर्ड राखेपनि उनीहरु फर्केको भने केही रेकर्ड यहाँको प्रशासनले राखेको छैन ।

जिल्ला प्रहरी कार्यालय रुपन्देहीका सूचना अधिकारी प्रहरी नायव उपरीक्षक सुरज कार्कीले ठूलो समूह नआएकोले व्यक्ति एक्लै एक्लै आएको सबै विवरण थाहा नभएको तर यसको सबै सूचना संकलन गर्ने जनाए ।

इलाका प्रहरी कार्यालय बेलहियाका प्रहरी निरीक्षक मुकेश न्यौपानेले केही विद्यार्थी आएको भएपनि समूहमा नआएकोले रेकर्डमा समस्या भएको बताए ।

फर्किएका विद्यार्थीका अनुसार रुपन्देही आसपासका मात्रै करिब ३ सय विद्यार्थी त्यो कलेजमा रहेको र अधिकांश फर्कने क्रममा रहेका छन् । अन्तिम वर्षमा पढ्ने विद्यार्थी मात्रै केही उता रहेको अरु सबै फर्किएको उनीहरुको भनाइ छ ।

फर्किएका विद्यार्थीले त्यहाँको प्रशासन नेपाली विद्यार्थीमाथि निकै आक्रामक भएकाले तत्काल शैक्षिक तथा सुरक्षाको ग्यारेन्टी गरेपछि मात्रै फर्कने जनाउँदै त्यसको वातावरण बनाइदिन सम्बन्धित निकायलाई आग्रह गरेका छन् ।

आजसम्म बीरगन्ज नाकाबाट ९५ जना फर्केको सूचना पाएको विद्यार्थीले जनाएका छन् । त्यहाँ आफ्नो घरको नजिक पर्ने नाकामार्फत विद्यार्थीहरु जाने गरेका छन् ।