`लाजशरणम´विरूद्ध आलमले थापे अड्काे, अदालतले दियाे यस्ताे आदेश

काठमाडौं । प्रदर्शाेन्मुख चलचित्र ‘लाजशरणम’ सेन्सर पास हुनुअघि कुनै पनि प्रचार सामग्री सार्वजनिक नगर्न अदालतले आदेश दिएको छ ।

पूर्वमन्त्री मोहम्मद आफताब आलमले चलचित्रविरूद्ध हालेको रिटमा सो आदेश आएको हो ।

चलचित्रमा सिताराम कट्टेल धुर्मुसले निभाएको भूमिका आफूसँग मिलेको भन्दै आलमले उच्च अदालत पाटनमा रिट निवेदन दिएका थिए । अदालतको आदेशले भोलि हुने भनिएको ट्रेलर रिलिज रोकिएको छ ।

उच्च अदालतले मंगलबार छलफलका लागि दुई पक्षलाई बोलाएको थियो । आलमका वकिलहरुले धुर्मुसले निभाएको चरित्रमाथि आपत्ति जनाएका थिए । उनको गेटअप हुबहु आलमको जस्तै भएकाले यसबाट आलमको मानहानी हुने उनीहरुको तर्क थियो ।

लाजशरणमको तर्फबाट बहस गरेका वकिलहरुले भने सो चरित्रको आलमसँग कुनै लेनादेना नभएको बताए । गेटअप मिल्दैमा मानहानी नहुने उनीहरुको तर्क थियो ।