‘फेरि रेशम फिलिली’को ट्रेलर सार्वजनिक

काठमाडौं । महाशिवरात्रीको दिन फागुन १४ गते रिलिज हुने चलचित्र ‘फेरि रेशम फिलिली’को ट्रेलर सार्वजनिक गरिएको छ । ३ मिनेट ७ सेकेन्ड लामो ट्रेलरमा चलचित्रका सबै पात्रलाई अटाइएको छ।

चलचित्रमा अमेरिका जान एक युवाले गर्ने संघर्षको कथा प्रस्तुत गरिएको निर्माण पक्षले जनाएको छ ।

चलचित्रमा विनय श्रेष्ठ, सुपुष्पा भट्ट, कामेश्वर चौरसिया, नीर शाह, प्रकाश घिमिरे, शिशिर वाङ्गदेल, रवीन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापालगायतको अभिनय छ ।

सुशन प्रजापतिको छायांकन र आकाश बरालको पटकथा रहेको चलचित्रमा नरेश किङ योगीको द्वन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइबा र दीपक शर्माको संगीत र सुरेन्द्र पौडेलको सम्पादन छ ।

सिनेमा आर्ट र वि मोसन पिक्चर्सको सहकार्यमा निर्माण भएको चलचित्रमा रौनकविक्रम कँडेल निर्माता तथा सुरज बम ठकुरी कार्यकारी निर्माता र सहनिर्मातामा एनी थापा छन् । चलचित्रलाई निरोज महर्जनले निर्देशन गरेका हुन् ।