‘दुःखी आत्मा’को सेन्सरः यूएईमा फेल, कतारमा पास

काठमाडौं । नेपालमा शुक्रबारदेखि रिलिज भएको फिल्म ‘दुःखी आत्मा’ यूएईको सेन्सरमा फेल भएको छ । यूएईमा दुई पटक सेन्सर गर्दा पनि पास नभएकाले फिल्म रिलिज हुन नसकेको निर्देशक तथा लेखक दीपेन्द्र लामाले जानकारी दिए ।

पहिलो पटक फिल्मको सेन्सर फेल भएपछि केही दृश्य काँटछाँट गर्न लगाइएको थियो, तर दोस्रो पटक काँटछाँट गरेर सेन्सरमा लैजाँदा पनि फेल भएको निर्माण पक्षले बताएको छ ।

मिडिया कन्टेन्टको सीमारेखाभित्र नपरेका कारण फिल्म यूएईमा पास हुन नसकेको बताइएको छ । यूएईमा ‘यूएई मिडिया काउन्सिलले’ फिल्म हेर्ने नियम छ ।

यूएईमा फिल्म पास नभएपछि बहराइनमा पनि रिलिज नहुने भएको छ, कतारको सेन्सरबाट भने फिल्म पास भएको छ । विनाकाँटछाँट फिल्म कतारको सेन्सरबाट पास भएको निर्माण पक्षले जनाएको छ । कतारमा शुक्रबारबाटै फिल्म हलहरुमा लागिरहेको छ ।

दयाहाङ राई, आँचल शर्मा, अनुपविक्रम शाही, बुद्धि तामाङ, रेअर राईलगायतका कलाकारहरुले अभिनय गरेको फिल्म ‘इडी’ रोग लागेका पुरुषहरुको कथामा आधारित छ । हिमाल कडरिया निर्माता रहेको फिल्ममा सुदीप ढकाल कार्यकारी निर्माता छन् ।