बागमती गोल्डकपः आयोजकविरुद्ध बागमतीको जित

हेटौंडा । सातौं संस्करणको बागमती गोल्डकप राष्ट्रिय फुटबल प्रतियोगिताको उद्घाटन खेलमा सर्लाहीको बागमती युवा क्लबले आयोजक बागमती खेलकुद विकास समितिलाई पराजित गरेको छ ।

आयोजकलाई पराजित गर्ने क्रममा सर्लाहीका कप्तान विमल घिसिङले खेलको ७९ औं मिनेटमा गरेको गोल नै निर्णायक बन्यो ।

स्थानीय शहीद स्मृति रंगशालामा भएको खेलमा घिसिङ नायक बन्दा आयोजक पहिलो दिननै खेलबाट बाहिरियो । उनी म्यान अफ द म्याचसमेत घोषित भए ।

आगामी फागुन १२ गतेसम्म चल्ने प्रतियोगितामा ‘ए’ डिभिजनका ७ र मोफसलका तीन टीमको सहभागिता छ । प्रतियोगिताको विजेताले १० लाख र उपविजेताले पाँच लाख पाउनेछन् ।

यस्तै प्रतियोगिताको सर्वोत्कृट खेलाडीलाई एक लाख एक हजार तथा विधागत उत्कृष्ट खेलाडीलाई जनही २५ हजार, प्रत्येक खेलका म्यान अफ दी म्याचलाई १० हजार रुपैयाँसहित शिल्ड प्रदान गरिने आयोजकले जनाएको छ ।