‘रंगी’को प्रिमियरमा हिरोइनभन्दा हट देखिइन् करिश्मा ! चलचित्रले पायो व्यापक प्रशंसा

काठमाडौं । नायक सलोन बस्नेतले निर्माण र अभिनय गरेको चलचित्र ‘रंगी’ को हिजो प्रिमियर शो आयोजना गरिएको छ । प्रिमियर शोमा उपस्थित पाहुनाहरूले चलचित्रको हृदयदेखि प्रशंसा गरे ।

‘बाबु र छोरी’ को मार्मिक कथामा उनिएको ‘रंगी’ गीतहरू पहिल्यै हिट छन् । ट्रेलरले पनि चलचित्रप्रति निकै अपेक्षा जगाएको थियो । र, अपेक्षा गरिएजस्तै चलचित्र मार्मिक र हृदयस्पर्शी रहेको प्रतिक्रिया प्रिमियर हेर्नेहरूले दिए । चलचित्र हेर्दा आँशु थाम्न गाह्रो भएको उनीहरूको अनुभूति थियो । बाल कलाकार आयूषी ढकालको अभिनयको सबैले प्रशंसा गरे ।

प्रिमियरमा धेरैको नजर चाहिँ करिश्मा केसीमाथि पर्‍यो । उनी सलोनकी पत्नी र चलचित्रकी निर्मात्री हुन् । करिश्मा निकै सजिएर गएकी थिइन् । कतिले नायिका नम्रता श्रेष्ठभन्दा निर्मात्री करिश्मा हट देखिएको टिप्पणी समेत गरे । त्यसो त नम्रता पनि कम सुन्दर देखिएकी थिइनन् ।

अरू चलचित्रको प्रिमियरमा नायक र नायिकाहरू जोडी बाँधेर हात समाउँदै हिँडेको देखिन्थ्यो । तर, ‘रंगी’ को प्रिमियरमा फरक दृश्य देखियो नायक सलोन बस्नेतले बाल कलाकार आयूषीलाई लिएर हिँडिरहेका थिए ।

नायिका नम्रता भने प्राय निर्मात्री करिश्मासँग देखिइन् । उनीहरूको केमेस्ट्री खुबै मिलेको थियो । गेटअप पनि मिल्दोजुल्दो थियो ।

चलचित्रको प्रियमरमा केही कलाकारहरू पनि देखिए । अभिनेत्री पूजा चन्द, दिपाश्री निरौलादेखि नायक सलिनमान बानिया लगायत सलोनको निम्तो मान्न पुगेका थिए । सलोनको परिवारका सदस्यहरूमध्ये अष्ट्रेलियामा रहेका बुवा र बहिनी प्रिमियरमा अनुपस्थित रहे । सलोनकी आमा, काका, फुपूहरू हलमा देखिए ।