बालेन शाहको स्वरमा चलचित्र ‘लाज शरणम्’को प्रोमोसन गीत सार्वजनिक (भिडिओसहित)

काठमाडौं । काठमाडौं महानगरपालिकाका मेयर बालेन शाहको स्वर रहेको र्‍याप गीत ‘लाज शरणम्’ टीमले आज सार्वजनिक गरेको छ । ‘नेपाल हाँसेको’को बोलको गीतमा बालेनको स्वर, संगीत र शब्द छ ।

गम्भीर विष्टले कोरियोग्राफी गरेको गीतको भिडियोमा अर्जुन घिमिरे, महेश त्रिपाठी, सागर लम्साल, हरिश निरौला, बबिन राई, गजित विष्ट, रामबाबु रेग्मी, आयुषी ढकाल र सानु पाण्डेको अभिनय रहेको छ ।

मेयर भएपछि बालेनले गाएको गीत सार्वजनिक भएको यो पहिलो पटक हो । यो गीतले ‘लाज शरणम्’को हाइप थप बढाउने निर्माण पक्षको दाबी छ ।

फागुन १४ गते महाशिवरात्रीको दिन रिलिज हुने चलचित्र ‘लाज शरणम्’ले केही दिनअगाडि मात्रै ‘हेर्दा हेर्दैमा‘’ बोलको गीत सार्वजनिक गरेको थियो ।

चलचित्र हाँस्य टेलिश्रृंखला ‘सक्किगोनि’को टीमले बनाएको हो । ‘लाज शरणम्’मा सीताराम कट्टेल ‘धर्मुस’ मुख्य भूमिकामा छन् । चलचित्रलाई सीतारामका भाइ कुमार कट्टेलले निर्देशन गरेका हुन् ।

चलचित्रमा धुर्मुससँगै अर्जुन घिमिरे, सागर लम्साल, हरिश निरौला, प्रियाना आचार्य, विजय बराल, महेश त्रिपाठी, अर्पण थापा, रेणु योगी, विजय लामा, मुकुन्द श्रेष्ठ, माला लिम्बूलगायत कलाकारको अभिनय छ ।

जेपीटी क्रियसनको ब्यानरमा निर्माण भएको चलचित्रमा नवीन श्रेष्ठ निर्माता, रामनरेश शाह र सृजना खड्का सहनिर्माता रहेका छन् ।