सातौं बागमती गोल्डकप फुटबल फागुन ३ बाट

हेटौंडा । मकवानपुरको बागमती गाउँपालिकाले गर्दै आएको बागमती गोल्डकपको सातौं संस्करण फागुन ३ गते सुरु हुने भएको छ । बागमती गाउँपालिकाको झुरझुरेमा रहेको शहीद स्मृति रङ्गशालामा हुने प्रतियोगिता फागुन १२ गतेसम्म चल्नेछ ।

प्रतियोगितामा ‘ए’ डिभिजनका ७ सहित १० टीमको सहभागिता रहने आयोजक बागमती गाउँपालिका खेलकुद विकास समितिका अध्यक्ष रहरसिंह थिङले जनाए ।

प्रतियोगितामा ‘ए डिभिजनको डिफेन्डिङ च्याम्पियन मच्छिन्द्रसहित संकटा, थ्रीस्टार, त्रिभुवन आर्मी, एपीएफ र चर्च व्वाई क्लबको सहभागिता रहनेछ । आयोजकसहित मोफसलको थप तीन क्लबको पनि सहभागिता रहनेछ ।

प्रतियोगिताको विजेता टोलीले १० लाख, उपविजेताले ५ लाख नगदसहित ट्रफी प्राप्त गर्नेछन् । प्रतियोगिताको सर्वोत्कृष्ट खेलाडीले १ लाख १ हजार तथा विधागत उत्कृष्ट खेलाडीले २५ हजार रुपैयाँका दरले नगद पुरस्कार प्राप्त गर्नेछन् ।

प्रतियोगिताको हरेक खेलको म्यान अफ द म्याचले नगद १० हजार प्राप्त गर्ने आयोजकले जनाएको छ ।

प्रतियोगिता सम्पन्न गर्न ७३ लाख रुपैयाँ खर्च हुने अनुमान गरिएको छ । उक्त खर्च व्यवस्थापनको लागि गाउँपालिकाले ३० लाख रुपैयाँ बजेट विनियोजन गरेको छ । बाँकी रकम आयोजक समितिले व्यवस्थापन गर्नेछ ।

यसअघिका ६ वटा संस्करण बागमती गाउँपालिकाको फापरबारीमा रहेको जनता माविको खेल मैदानमा गरिएकोमा यो पटक नवनिर्मित रंगशालामा गरिने आयोजकको भनाइ छ । प्रतियोगिता नेकपा माओवादी केन्द्रका अध्यक्ष प्रचण्डले उद्घाटन गर्ने आयोजकले जनाएको छ ।