‘लाज शरणम्’ मा बालेनको र्‍याप, रिलिजअगाडि नै कसरी भयो लिक ? (लिरिक्ससहित)

काठमाडौं । ‘सक्किगोनी’ टिमले निर्माण गरेको चलचित्र ‘लाज शरणम’ मा काठमाडौं महानगरपालिकाका मेयर बालेन्द्र साहको र्‍याप हेर्न पाइने भएको छ । बालेनले कुनै पनि चलचित्रका लागि पहिलो पटक स्वर दिएका हुन् ।

निर्माण पक्षले आज दिउँसो उक्त र्‍याप युट्युबमा रिलिजको तयारी गरेको छ । बालेन आफैँले लेखेको यो र्‍याप नयाँ भने होइन । उनले केही वर्ष अगाडि नै लेखेर रेकर्डसमेत गराएका थिए ।

सन् २०१५ मा नै बालेनको आफ्नै युट्युब च्यानलबाट अडियो रिलिज गरिएको थियो । भिडिओ भने बनेको थिएन । यसले अहिलेसम्म ३ लाख ८३ हजार भ्यूज पाएको छ ।

बालेनले यही र्‍याप ‘लाज शरणम’ मा प्रयोग गर्न अनुमति दिएका हुन् । अहिले यो र्‍यापलाई फेरी नयाँ रेकर्ड गराएर चलचित्रमा राखिएको हो । चलचित्र स्रोतका अनुसार र्‍यापमा बालेन स्वयम् देखिने भने छैनन् ।

बालेनको यो र्‍याप निर्माण पक्षले सार्वजनिक गर्नु अगाडि नै भाइरल भइसकेको छ । धेरैले युट्युबबाट अडियो डाउनलोड गरेर टिकटकमा हालिरहेका छन् । यद्यपि, लाज शरणमका लागि बनाइएको भिडिओ भने लिक भएको छैन ।

यस्तो छ बालेनको र्‍यापको लिरिक्स:

कोरस:

म नेपाल हाँसेको हेर्न चाहन्छु,
नेपालीको मन नाचेको हेर्न चाहन्छु
नेपाली खुसीले बाँचेको हेर्न चाहन्छु

बालेन

अत्याचार, आक्रमण, अपराध, असमझदारी…
विकल्पविहीन, विदेशी बैंक भन्छ भिकारी…
शिकारी नेता, अभिनेता, धन्छ क्रान्तिकारी…
बिगारी केटा÷केटी, भोको पेट रेटी, सिपाही…
अविवाहित चेलीबेटी, बोकी पेट खेपी पिटायी
बिताई रात, कुटायी घात खाएर, शरीर बिकाइ
देशको माटो नै मिठाइ ठानी मैदान त्यो युद्धको…
गिद्ध थ्यो जो, देशको लागि भक्त झैँ प्रसिद्ध भो…
निःशब्द भो, अवशेष बाँकी चोखो बोली जोसित थ्यो…
सिरजफ्त भो, देशव्यापी–आत्म–घाती– जो पवित्र थ्यो…
आफ्नो प्राणको आहुती, आफ्नो ज्यानको विभूति
ल्याई हिँडेको शहिदको केवल नामावली विभूषित
कुण्ठित पिडामा डुबेकी आमालाई के काम विदुषी
गरिबलाई दुई छाक नै खुशी, सरिफलाई चाहिन्छ कुर्सी…
आमाकै साडी बेचेर, धनाढ्य सँगै छ पूँजी
गोजीभरी भारु भराऊ भरेर भारतीको रोजी

कोरस

म नेपाल हाँसेको हेर्न चाहन्छु,
नेपालीको मन नाचेको हेर्न चाहन्छु
नेपाली खुसीले बाँचेको हेर्न चाहन्छु

बालेन

देश एउटा सुन्दर बगैँचा होस, रंगीचंगी फूलहरू
हरेकलाई समान गलैँचा होस आदर हरेक मूलहरू
अनुकूल प्रतिकुलहरू चिन्ता गर्ने भावना होस
सामूहिक खुशी बिनाको के फाइदा त्यो चाहनाको
औचित्य के त्यो कामनाको, एउटा हाँसो फुट्नलाई
उद्देश्य लेउ एक होऊ हरेक हातहरू जुट्नलाई
गरेर अब देखाऊ, कालो अतीतलाई मेटाऊ
पालो हाम्रो हो भेटाऊ, कल्पना गर शान्तिको।
सपना देख्नेकै पुरा हुन्छ, जागृति नै क्रान्ति हो
बिपनामा बाटो खुल्ला हुन्छ आकृतिको सालिकको
न सोच्नु तिमी मालिक हौ र मिहिनेत गर्ने नोक्कर हो
तिमीले ठोक्कर खाने छौ, मानव मानवता बेगरको…
एकपटक कारण बनी हेर अरुको सानो हाँसो को
उसको मुस्कानमा रमाइ हेर निस्वार्थ प्रेम साँचो हो
यो खाँचो हो मायाको पुरा भए नेपाल हाँस्ने छ
एक आपस मर्म बुझिदिए हरेक क्षणमा बाँच्ने छौँ

कोरस

म नेपाल हाँसेको हेर्न चाहन्छु,
नेपालीको मन नाचेको हेर्न चाहन्छु
नेपाली खुसीले बाँचेको हेर्न चाहन्छु