आफ्नै दलका सांसदले अविश्वासको प्रस्तावमा मत हाल्ने धम्की दिएपछि राजीनामा दिए मणिपुरका मुख्यमन्त्री सिंहले

काठमाडौं । जातीय हिंसाको चपेटामा परेको उत्तर पूर्वी भारतीय राज्य मणिपुरका मुख्यमन्त्री वीरेन सिंहले राजीनामा दिएका छन् ।

उनको राजीनामा आइतबार आएको भारतीय मिडियाहरूले उल्लेख गरेका छन् ।

विपक्षी कंग्रेसले राखेको अविश्वास प्रस्तावमा भारतीय जनता पार्टी (बीजेपी)कै सांसदले भोट हाल्ने धम्की दिएसँगै सिंहको राजीनामा आएको हो ।

भारतीय डिजिटल मिडिया दि प्रिन्टका अनुसार मणिपुर विधान सभाको सातौँ सत्रमा राखिएको अविश्वास प्रस्तावमा आफ्नै दलका सांसद (एमएलए)ले भोट हाल्ने भनेपछि बीजेपीको केन्द्रीय नेतृत्वले हस्तक्षेप गरेर राजीनामा गर्न लाएको बताइएको छ ।

वीरेन सिंह जातीय मुद्दामा र हिन्दू मुद्दामा कट्टर मानिन्थे । उनले जातीय हिंसा रोक्न नसकेको आरोप लाग्दै आएको थियो ।

भारतीय डिजिटल मिडिया दि वायरले मणिपुरमा जातीय हिंसा भएको ६४९ दिनमा सिंहले राजीनामा दिएको उल्लेख गरेको छ ।

वायरका अनुसार राजीनामा अगाडि सिंहले बीजेपी नेता अमित शाहलाई भेटेका थिए । भेट १५ मिनेट भएको थियो ।

६० हजार विस्थापित भएको मणिपुरको जातीय हिंसामा २५९ को ज्यान गएको दि वायरले उल्लेख गरेको छ ।