प्रचण्डको प्रश्न- नेपालमा अर्को विद्रोह आवश्यक भएकै हो त ? (भिडिओ)

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले कांग्रेस-एमाले सरकार संविधानविपरीत बनेको भन्दै अर्को विद्रोहमा जाने चेतावनी दिएका छन् । संविधान संशोधनको विषयमा संविधान निगरानी समूहले आयोजना गरेको कार्यक्रममा प्रचण्डले अर्को विद्रोहको धम्की दिएका हुन् ।

कार्यक्रममा प्रचण्डले भने, ‘कहिलेकाहीँ त मैले के सोच्ने गरेको छु भने नेपालमा एउटा ठूलो आन्दोलन आवश्यक भएको हो कि क्या हो ? कसैले अधिकार दिनै नमान्ने, स्थानीय र प्रदेशलाई अधिकार नै नदिने हो भने मलाई समेत आन्दोलनमा जानुपर्छ भन्ने लागेको छ । निराशा बढेको बढ्यै छ, अर्को विद्रोह आवश्यक भएकै हो त ? अब विस्तारै मानिसहरुको मनमा यो प्रश्न आउँदैछ । अहिले म त्यो निष्कर्षमा पुगिसकेको अर्थ नलागोस्, तर जनतामा देखिएको निराशा, युवामा देखिएको फ्रस्टेशनले त्यो दिशामा लैजाँदैछ ।’

अध्यक्ष प्रचण्डले अहिलेको सरकार संविधानविपरीत बनेको दाबीसमेत गरे । उनले एमाले र कांग्रेस मिलन लोकतान्त्रिक पनि नभएको र उनीहरुले संविधान संशोधन भनेर जनतालाई ढाँटेको आरोप लगाए ।

उनले संविधान निगरानी समूहका संयोजक पूर्वप्रधानन्यायाधीश कल्याण श्रेष्ठको प्रशंसा गर्दै अहिलेको सरकार असंवैधानिक हो भन्न अदालत डराएको र राष्ट्रपतिलाई दबाब दिइएको आरोपसमेत लगाए ।