‘अच्छा लेकिन लण्डनको चिसोले समाउला’ नयाँ भर्जनमा, रचनाको स्वरमा राजेश हमालको नाँच

काठ्माडौं । चलचित्र ‘दैव संजोग’मा समावेश चर्चित गीत ‘अच्छा लेकिन लण्डनको चिसोले समाउला’ फेरि दर्शकमाझ आउने भएको छ । चैतको २९ गतेबाट रिलिजमा आउन लागेको चलचित्र ‘नरसिंहाः अवतार’मा यो गीतलाई समावेश गरिएको हो ।

यो गीतको पुरानो भर्जनमा संगीतकार तथा गायक शम्भुजित बाँस्कोटा र गायिका देविका बन्दनाको स्वर थियो । नयाँ भर्सनमा भने शम्भुजित र गायिका रचना रिमालले स्वर भरेका छन् ।

यो गीतको भिडियोलाई ४ दिन लगाएर खिचिएको छ । जरसिंह पौवामा सेट नै लगाएर हिमाललाई काखमा राख्दै यो गीतको भिडियो खिचिएको हो । गीतको भिडियोमा कविराज गहतराजको कोरियोग्राफी छ ।

यो चलचित्रका निर्देशक दिवाकर भट्टराइले १५ लाख रुपैयाँ खर्च गरेर गीतको भिडियो तयार पारिएको बताएका छन् ।

यो गीतमा चलचित्रका मुख्य कलाकारहरु राजेश हमाल, सरोज खनाल, राज कटुवाल, नीति शाह, उषा खड्गी, सनिषा भट्टराइले नृत्य गरेका छन् ।

नायक राजेश हमालले यो गीतले आफूलाई फेरि विगतमा फर्काएको भन्दै दर्शकले मन पराउने विश्वास व्यक्त गरे । गीतको भिडियोमा नायक हमाल र अर्का नायक कटुवाललाई कर्नेलको अवतारमा देख्न पाइनेछ ।

यो चलचित्रमा नायक हमाल र खनालले ३२ बर्षपछि सहकार्य गर्दैछन् भने यो पूर्व मिस नेपाल उषा खड्गीको डेब्यू फिल्म हो । यही चलचित्रबाट नायक हमाल ८ वर्षपछि पर्दामा फर्किँदैछन् ।